کو لمبو: ایشیا کپ سپر فور مرحلے کے دوسرے میچ میں سری لنکا نے بنگلادیش کو 21 رنز سے ہرا دیا ۔
سری لنکا کے 258 رنز کے ہدف کے سامنے بنگلادیشی ٹیم 236 رنز پر ڈھیر ہوگئی،بنگلادیش نے سری لنکا کو ٹاس جیت کر پہلے بیٹنگ کرنے کی دعوت دی ،سری لنکا نے پہلے بیٹنگ کرتے ہوئے مقرر 50 اوورز میں 9 وکٹوں کے نقصان پر 257 رنز بنائے۔
سدیرا سمارا وکراما نے 93 رنز کی عمدہ اننگز کھیلی جبکہ انکے علاوہ کوشل مینڈس 50 اور پاتھم نسانکا 40 رنز بنا کر قابلِ ذکر بلے باز رہے۔
بنگلادیش کی جانب سے حسن محمود اور تسکین احمد نے تین تین کھلاڑیوں کو پویلین کی راہ دکھائی جبکہ شرف الاسلام 2 وکٹیں لینے میں کامیاب رہے۔
ہدف کے تعاقب میں 55 رنز کی اوپننگ پارٹنرشپ کے ساتھ بنگلادیش کا آغاز اچھا رہا، تاہم یکے بعد دیگر 4 اہم وکٹیں گرنے کے بعد سری لنکا نے شکیب الیون کو بیک فٹ پر دھکیل دیا،اوپنرز مہدی حسن نے 28 اور محمد نعیم نے 21 رنز کی اننگز کھیلیں۔ کپتان شکیب الحسن 3 اور لٹن داس 15 رنز بنا پائے،توحید ہردوئے اور مشفق الرحیم کے درمیان پارٹنرشپ نے ٹیم کو سنبھالا لیکن 28 رنز بنانے والے مشفق زیادہ دیر توحید کا ساتھ نہ نبھاسکے، توحید ہردوئے نے 82 رنز کی اننگز کھیلی۔
مہیش تھیکشنا نے توحید ہردوئے سمیت 3 اہم وکٹیں لے کر بنگلادیش کے جیت کے خواب کو چکنا چور کردیا۔
