اسلام آباد:نگراں وزیراعظم انوار الحق کاکڑ نے کہا ہے کہ حکومت الیکشن کمیشن کو ملک میں آزادانہ، منصفانہ اور شفاف انتخابات کے انعقاد کیلئے ہر قسم کا تعاون فراہم کرے گی اور اس سلسلے میں تمام ضروری وسائل کی فراہمی یقینی بنائی جائے گی۔
ان خیالات کا اظہار انہوں نے چیف الیکشن کمشنر سکندر سلطان راجہ سے گفتگو کرتے ہوئے کیا جنہوں نے منگل کو یہاں وزیراعظم ہائوس میں ان سے ملاقات کی۔
ملاقات میں چیف الیکشن کمشنر نے وزیراعظم کو عام انتخابات کے انعقاد کے حوالے سے کمیشن کی تیاریوں پر بریفنگ دی۔ چیف الیکشن کمشنر نے وزیراعظم کو عام انتخابات کی تیاریوں کا جائزہ لینے کیلئے الیکشن کمیشن کا دورہ کرنے کی دعوت بھی دی۔ وزیراعظم نے کہا کہ حکومت الیکشن کمیشن کو ملک میں آزادانہ، منصفانہ اور شفاف انتخابات کے انعقاد کیلئے ہر قسم کا تعاون فراہم کرے گی اور تمام ضروری وسائل کی فراہمی یقینی بنائے گی۔
