ماسکو: روس کے صدر ولادیمیر پیوٹن نے ایران کے نئے رہبرِاعلیٰ مجتبیٰ خامنہ ای کو عہدہ سنبھالنے پر مبارکباد دیتے ہوئے دونوں ممالک کے درمیان اسٹریٹجک تعلقات کو مزید مضبوط بنانے کے عزم کا اظہار کیا ہے۔
روسی صدارتی دفتر کریملن کی جانب سے جاری بیان کے مطابق صدر پوتن نے اپنے تہنیتی پیغام میں امید ظاہر کی کہ ایران اور روس کے درمیان دوطرفہ تعاون، باہمی احترام اور مشترکہ مفادات کی بنیاد پر مزید فروغ پائے گا۔
انہوں نے کہا کہ روس اور ایران کے تعلقات خطے میں استحکام، سلامتی اور اقتصادی تعاون کے فروغ میں اہم کردار ادا کر سکتے ہیں۔ روسی صدر نے اس بات پر بھی زور دیا کہ دونوں ممالک کے درمیان سیاسی، تجارتی اور توانائی کے شعبوں میں تعاون کو مزید وسعت دینے کے وسیع امکانات موجود ہیں۔
صدر پوتن نے اپنے پیغام میں ایران کی قیادت اور عوام کے لیے نیک تمناؤں کا اظہار کرتے ہوئے امید ظاہر کی کہ نئی قیادت کے دور میں ایران ترقی اور استحکام کی راہ پر گامزن رہے گا۔
دوسری جانب ایرانی حکام نے روسی صدر کے تہنیتی پیغام کو دونوں ممالک کے قریبی تعلقات کا مظہر قرار دیا ہے۔ تجزیہ کاروں کے مطابق ایران اور روس کے درمیان حالیہ برسوں میں دفاعی، توانائی اور علاقائی امور کے حوالے سے تعاون میں نمایاں اضافہ دیکھنے میں آیا ہے۔
واضح رہے کہ ایران میں حالیہ سیاسی تبدیلیوں کے بعد مجتبیٰ خامنہ ای کو ملک کا نیا رہبرِاعلیٰ مقرر کیا گیا ہے، جس کے بعد مختلف عالمی رہنماؤں کی جانب سے مبارکباد کے پیغامات کا سلسلہ جاری ہے
