بنگلورو : نیوزی لینڈ نے پاکستان کے خلاف رنز کا پہاڑ کھڑا کر دیا ۔
آئی سی سی ورلڈکپ کے اہم میچ میں کپتان بابراعظم نے ٹاس جیت کر نیوزی لینڈ کو بیٹنگ کی دعوت دی۔
نیوزی لینڈ کی پہلی وکٹ 68 رنز پر گری جس کے بعد ولیمسن اور رچن رویندرا نے پاکستانی بولرز کی خوب درگت بنائی اور چھکے چوکوں کی برسات کردی۔
رچن رویندرا نے شاندار ابیٹنگ کا مظاہرہ کرتے ہوئے سنچری اسکور کی جب کہ ولیمسن 95 پر پویلین لوٹ گئے۔
اس کے بعد آنے والے بیٹرز نے بھی بولرز کی جم کر پٹائی کی جس میں پاکستان کی طرف سے شاہین کو 10 اوورز میں 90 رنز پڑے اور وہ پاکستان کی طرف سے ورلڈکپ میں مہنگے ترین بولر بن گئے،شاہین کے بعد حارث رؤف نے سب سے زیادہ 10 اوور میں 85 رنز دیے،نیوزی لینڈ نے ورلڈکپ میں پاکسان کے خلاف کسی بھی ٹیم کا سب سے بڑا اسکور بنادیا۔
نیوزی لینڈ نے پاکستان کو جیت کےلیے 402 رنز کا ہدف دیا جس میں 46 چوکے اور 8 چھکے شامل تھے۔
نیوزی لینڈ نے ورلڈکپ کے ایک میچ میں سب سے زیادہ چوکوں کا ریکارڈ بھی بنایا اس سے قبل جنوبی افریقہ نے سری لنکا کےخلاف 45 چوکے لگائے تھے۔
