لاہور: عید کا چاند دیکھنے کے لیے اہم اجلاس آج، رویت کے امکانات نہ ہونے کے برابر ہیں۔
ملک بھر میں عید الفطر کے چاند کی رویت کے لیے مرکزی رویت ہلال کمیٹی کا اجلاس آج اسلام آباد میں طلب کر لیا گیا ہے، جہاں شوال کے چاند سے متعلق موصولہ شہادتوں اور سائنسی ڈیٹا کا تفصیلی جائزہ لیا جائے گا۔
اجلاس نمازِ عصر کے بعد شروع ہوگا جس میں زونل کمیٹیوں کے اراکین، محکمہ موسمیات کے ماہرین اور دیگر متعلقہ حکام شرکت کریں گے۔ اجلاس کے دوران ملک کے مختلف حصوں سے چاند دیکھنے کی اطلاعات پر غور کیا جائے گا۔
محکمہ موسمیات اور سائنسی ماہرین کے مطابق آج شوال کا چاند نظر آنے کے امکانات انتہائی کم ہیں۔ ماہرین کا کہنا ہے کہ نئے چاند کی پیدائش آج صبح 6 بج کر 23 منٹ پر ہو چکی ہے، تاہم غروبِ آفتاب کے وقت اس کی عمر تقریباً 12 سے 13 گھنٹے ہوگی، جو رویت کے لیے ناکافی ہے۔
مزید یہ کہ غروبِ آفتاب اور غروبِ قمر کے درمیان وقفہ بھی محض 28 منٹ ہے، جس کی وجہ سے چاند کا واضح طور پر نظر آنا تقریباً ناممکن قرار دیا جا رہا ہے۔
سائنسی تخمینوں کے مطابق ملک میں 30 روزے مکمل ہونے کا امکان ہے اور عید الفطر ہفتہ 21 مارچ کو متوقع ہے۔ تاہم چاند کی رویت کا حتمی اعلان مولانا عبدالخبیر آزاد اجلاس کے بعد کریں گے۔
