اسلام آباد : چیف جسٹس سپریم کورٹ جسٹس قاضی فائز عیسیٰ نے گارڈ آف آنر لینے سے انکار کر دیا۔
چیف جسٹس کا منصب سنبھالنے کے بعد پہلے دن سپریم کورٹ آمد پر چیف جسٹس پاکستان قاضی فائز عیسیٰ نے پولیس کو اپنی ذمے داری دل جمعی سے ادا کرنے کی ہدایت کی۔
اسلام آباد پولیس کی جانب سے چیف جسٹس پاکستان کو گارڈ آف آنر پیش کیا جانا تھا لیکن انہوں نے گارڈ آف آنر لینے سے انکار کر دیا ۔
جسٹس قاضی فائز عیسیٰ کا سپریم کورٹ آمد پر عملے نے بھرپور استقبال کیا،اس موقع پر چیف جسٹس پاکستان قاضی فائز عیسیٰ نے عملے سے گفتگو کرتے ہوئے کہا کہ آج میری بہت ساری میٹنگز ہیں اور فل کورٹ ہے، آپ سب کا تعاون چاہیے،انہوں نے کہا کہ آپ لوگوں سے تفصیلی ملوں گا، لوگ سپریم کورٹ خوشی سے نہیں آتے، لوگ اپنے مسائل ختم کرنے کے لیے سپریم کورٹ آتے ہیں۔
چیف جسٹس پاکستان قاضی فائز عیسیٰ نے کہا کہ آنے والے لوگوں سے میزبان جیسا سلوک کریں، یقیناً کچھ لوگوں کو پریشانی ہوتی ہے۔
انہوں نے سپریم کورٹ کے عملے کو ہدایت کی کہ انصاف کے دروازے کھلے اور ہموار رکھیں، آنے والے لوگوں کی مدد کریں۔
چیف جسٹس بغیر پروٹوکول سپریم کورٹ پہنچے اور وہ اپنی ذاتی گاڑی میں عدالت آئے۔
