لاہور : ایشیا کپ کے سپر فو ر مرحلے کے پہلے میچ میں پاکستان نے بنگلادیش کو 7 وکٹوں سے ہرا دیا ۔
پاکستان نے194 رنز کا ہدف 40 ویں اوور میں 3 وکٹوں کے نقصان پر پورا کرلیا، امام الحق 78 اور محمد رضوان 63 رنز بناکر نمایاں رہے۔
بنگلادیشی ٹیم 38.4 اوورز میں 193 رنزبنا کر آؤٹ ہوگئی تھی، مشفیق الرحیم 64 اور کپتان شکیب الحسن نے 53 رنز کی اننگز کھیلی۔
فاسٹ بولر حارث رؤف نے 19رنزدے کر 4 وکٹیں حاصل کیں، نسیم شاہ نے 3 جبکہ شاہین آفریدی،فہیم اشرف اور افتخار احمد کوایک، ایک وکٹ ملی۔
میچ کے دوسرے اوور میں بنگلادیشی اوپنرز مہدی حسن میراز بغیر کوئی رنز کیے نسیم شاہ کی گیند پر فخر زمان کو کیچ دے بیٹھے۔ بنگلادیش کو دوسرا نقصان پانچویں اوور کی چوتھی گیند پر لٹن داس کی صورت میں اٹھانا پڑا جب بنگلادیشی بیٹر لٹن داس 16 رنز بنا کر شاہین شاہ آفریدی کا شکار ہوئے جس کے بعد بنگلادیش کی اگلی دو وکٹیں فاسٹ بولر حارث رؤف کے حصے میں آئیں۔
حارث رؤف نے اوپنر محمد نعیم کو 20 اور توحید ہردوئے کو صرف 2 رنز پر پویلین کی راہ دکھائی۔
بنگلادیش کو پانچواں نقصان کپتان شکیب الحسن کی صورت میں اٹھانا پڑا، وہ 53 رنز بناکر فہیم اشرف کا شکار بنے۔پاکستان کےخلاف بنگلادیشں کی چھٹی وکٹ 174 رنز پرگری جب شمیم حسین 16 رنزپر افتخار احمد کی گیند پرآؤٹ ہوئے۔
اس کے بعد سیٹ بیٹر مشفیق الرحیم 64 رنز بناکر حارث رؤف کی گیند پر وکٹ دے بیٹھے اور پھر نئے آنے والے تسکین احمد بھی صفر پر حارث رؤف کی گیند پر آؤٹ ہوئے، عاطف حسین 12 اور شریف السلام ایک رنز بناکر پویلین لوٹے۔
پاکستان کے فاسٹ بولر حارث رؤف نے ون ڈے کرکٹ میں اپنے 50 شکار مکمل کرلیے ۔
حارث رؤف نے اپنے27 ویں ون ڈے میچ میں 50 وکٹیں مکمل کرنے کا سنگِ میل عبور کیا۔وہ وقار یونس کے ساتھ مشترکہ طور پر ون ڈے میں 50 وکٹیں لینے والے تیسرے تیز ترین پاکستانی بولر ہیں۔
بنگلادیش کے 194 رنز کے ہدف کے تعاقب میں پاکستان نے اپنی اننگز کا آغاز کیادونوں اوپنرز نے ٹیم کو 35 رنز کا آغاز فراہم کیا لیکن پھر فخر زمان ایک بار پھر بڑی اننگز کھیلنے میں ناکام رہے اور 20 رنز بناکر ایل بی ڈبلیو ہوگئے۔
پاکستان کو دوسرا نقصان کپتان بابر کی صورت میں اٹھانا پڑا، وہ صرف 17 رنز بناکر تسکین احمد کی گیند پر بولڈ ہوگئے۔ایسے میں امام الحق اور رضوان نے شاندار بیٹنگ کی۔ امام الحق 84 گیندوں پر 78 رنز بناکر بولڈ ہوگئے جبکہ رضوان نے ناقابل شکست 63 رنز کی اننگز کھیلی۔اس کے علاوہ سلمان علی آغا نے 12 رنز بنائے، یوں پاکستان نے ہدف39.3 اوورز میں 3 وکٹوں کےنقصان پر حاصل کرلیا،حارث رؤف کو شاندار بولنگ پر پلیئر آف دی میچ قرار دیا گیا۔
