لاہور:ایشین کرکٹ کونسل نے ایشیا کپ کا شیڈول مذاق بنا دیا۔
اے سی سی کے صدر جے شاہ کی من مانیوں نے ایشیا کپ کا وینیو تبدیل نہ ہونے دیا ذرائع کے مطابق اس پر پاکستان کرکٹ بورڈ نے شدید تحفظات کا اظہار کر دیا،پہلے میچز ہیمبنٹوٹا منتقل کرنے پر اتفاق ہوا اور اب دوبارہ شیڈول کے مطابق میچز کولمبو میں ہی کرانے کا کہہ دیا گیا،جے شاہ پہلے ورلڈ کپ کے شیڈول کو بھی بار بار تبدیل کرکے ورلڈکپ کا مزہ کر کرا کر چکے ہیں ،جے شاہ نے اب ایشیا کپ کے حوالے سے بھی فیصلوں کو جگ ہنسائی کا سبب بنا دیا۔
پاکستان کرکٹ بورڈ نے جے شاہ کے یک طرفہ فیصلوں پر شدید ناراضگی کا اظہار کر دیا، پی سی بی ذرائع کے مطابق لاجسٹک کے تمام انتظامات شروع کرنے کے بعد اب پھر نئے سرے سے انتظامات کرنا ہوں گے، کھلاڑی بھی صورت حال واضح نہ ہونے کی وجہ سے پریشان ہیں۔
ذرائع کے مطابق پاکستان کرکٹ بورڈ نے یک طرفہ فیصلہ ماننے سے انکار کر دیااور اے سی سی کا ہنگامی اجلاس بلا نے کا مطالبہ کر دیاہے۔
