لاہور :لاہور ہائیکورٹ کے حکم پر سابق وزیر اعلی اور تحریک انصاف کے صدر چوہدری پرویز الٰہی کو رہائی کے بعد دوبارہ۔ گرفتار کرلیا گیا۔
اسلام آباد پولیس نے چودھری پرویز الٰہی کو نقص امن کے تحت دوبارہ گرفتار کرلیا،پولیس چودھری پرویز الٰہی کو گرفتار کرکے پو لیس اسلام آباد روانہ ہو گئ ۔
قبل از یں لاہورہائیکورٹ کے سنگل بینچ نے پرویز الٰہی کی گرفتاری کے خلاف دائر درخواست پر سماعت کی جس سلسلے میں نیب حکام نے سابق وزیراعلیٰ کو عدالت میں پیش کیا۔
پرویز الٰہی نے نیب کی جانب سے اپنی گرفتاری کو عدالت میں چیلنج کیا تھا اور جسٹس امجد رفیق نے پرویز الٰہی کو پیش نہ کرنے کی صورت میں ڈی جی نیب کے وارنٹ جاری کرنے کاکہا تھا۔
عدالت نے جمعہ کو پرویز الٰہی کی درخواست پر فیصلہ سناتے ہوئے انہیں رہا کرنے کا حکم دیا۔
لاہور ہائیکورٹ میں سماعت کے دوران جسٹس امجد رفیق نے استفسار کیا کہ احتساب عدالت کو بتایا تھا کہ انٹرا کورٹ اپیل خارج ہو گئی تھی؟ اس پر نیب پراسیکیوٹر نے کہا کہ یہ میرے علم میں نہیں۔
نیب پراسیکیوٹر کے جواب پر جسٹس امجد رفیق نے کہا کہ اس کی مکمل انکوائری ہوگی، میں ابھی پرویز الٰہی کو فوری رہا کرنے کا حکم دے رہا ہوں۔
بعد ازاں لاہورہائیکورٹ نے پرویز الٰہی کی رہائی کا تحریری حکم جاری کردیا جس میں عدالت نے کہا کہ پرویز الٰہی کو نیب یا کوئی اتھارٹی اور ایجنسی گرفتار نہیں کرے گی جب کہ پرویز الٰہی کو کسی بھی قانون کے تحت نظر بند بھی نہیں کیا جائے گا۔
عدالت کے حکم پر چوہدری پرویز الہی کی رہائی کے بعد انہیں گھر منتقل کیا جا رہا تھا کہ راستے میں اسلام اباد پولیس نے انہیں گرفتار کر لیا بتایا گیا ہے کہ چوہدری پرویز الہی کو نقص امن کے تحت گرفتار کیا گیا ہے انہیں اسلام اباد منتقل کیا جائے گا۔
