پالی کیلے : ایشیا کپ کے دوسرے میچ میں بنگلادیش نے سری لنکا کو 5 وکٹوں سے شکست دے دی۔
بنگلادیش کےکپتان شکیب الحسن نے ٹاس جیت کر پہلے بیٹنگ کا فیصلہ کیا بنگلادیش کی پوری ٹیم 43 ویں اوور میں 164 رنز بنا کر آؤٹ ہوگئی، جواب میں سری لنکن ٹیم نے 165 رنز کا ہدف 5 وکٹوں کے نقصان پر 39 اوور میں پورا کرلیا۔
بنگلادیش کی جانب سے محمد نعیم اور تنزید حسن نے میچ کا آغاز کیا، اوپننگ بیٹر تنزید حسن صرف 4 رنز پر اور پھر مجموعی 25 رنز پر محمد نعیم بھی پویلین لوٹ گئے۔ بنگلادیشی کپتان شکیب الحسن بھی سری لنکا کے مینڈس کی گیند پر صرف5 رنز بناکر واپس لوٹ گئے، 162 کے مجموعی اسکور پر نجم الحسین 89 رنز بنا کر آؤٹ ہوگئے، ان کے علاوہ توحید نے 20، محمد نعیم نے 16 اور مشفیق الرحیم نے 13 رنزبنائے،بنگلادیش کی پوری ٹیم 42 اعشاریہ 4 اوورز میں 164 رنز بنا کر آؤٹ ہوگئی ،سری لنکا کی جانب سے ماتھیشا پتھیرانا نے 4 اور مہیش تھیکشانا نے 2 کھلاڑیوں کو آؤٹ کیا۔
سری لنکا کی جانب سے سدیرا سماراوکرما نے 6 چوکوں کی مدد سے 54 رنز کی اننگز کھیلی، پاتھم نسانکا 14 ، کوشل مینڈس 5 ، دھننجایا ڈی سلوا 2 اور کرونارتنے نے ایک رن بنایا۔
چیرتھ اسالنکا نے 62 رنز کی ناقابل شکست اننگز کھیلی اور ٹیم کی فتح کو یقینی بنایا، ڈاؤسن شاناکا 14 رنز کے ساتھ ناٹ آؤٹ رہے۔
بنگلادیش کی جانب سے شکیب الحسن نے 2 کھلاڑیوں کو آؤٹ کیا، تسکین احمد، شریف الاسلام اور مہدی حسن کو ایک ایک وکٹ ملی۔
