اسلام آباد : ایشیا کپ ٹی ۔20 کرکٹ ٹورنامنٹ (کل)سے شروع ہوگا جس کی میزبانی پاکستان اور سری لنکا کریں گے۔ یہ ایشیا کپ کا 16 واں ایڈیشن ہوگا۔
پاکستان اور سری لنکا کی مشترکہ میزبانی میں ٹورنامنٹ میں 6 ٹیمیں حصہ لیں گی۔ یہ پہلا ایشیا کپ ہوگا جس کی میزبانی2 ممالک کریں گے۔ 4 میچ پاکستان میں کھیلے جائیں گے اور بقیہ 9 میچ سری لنکا میں کھیلے جائیں گے۔
قبل ازیں ایشیا کپ ون ڈے فارمیٹ میں کھیلا جاتا رہا ہے ، یہ دوسری مرتبہ ہے کہ ایشیا کپ ٹی۔20فارمیٹ میں کھیلا جا ئے گا۔ ٹورنامنٹ کا ابتدائی میچ گروپ اے کی ٹیموں پاکستان اور نیپال کے درمیان ملتان کرکٹ سٹیڈیم ، ملتان میں کھیلا جائے گا۔
روایتی حریفوں پاکستان اور بھارت کی ٹیموں کے درمیان پہلا میچ 2 ستمبر کو پالے کیلی انٹر نیشنل کرکٹ سٹیڈیم ، کینڈی میں کھیلا جائے گا۔پاکستان اور بھارت کی ٹیمیں اس سے قبل ایشیا کپ میں 15 بار ایک دوسرے کے مد مقابل آئیں جہاں بھارت نے 8 جبکہ پاکستان نے 6 میچز میں کامیابی حاصل کی، یوں ایشیا کپ میں بھارتی ٹیم کا فتوحات کے اعتبار سے پلڑا بھاری ہے۔ ٹورنامنٹ کے میچز 30اگست اور 17ستمبر 2022 تک محدود فارمیٹ ٹی ۔20 انٹرنیشنل کے طور پر پاکستان اور سری لنکا میں کھیلے جائیں گے ، فائنل میچ 17 ستمبر کو آر پریما داسا انٹرنیشنل کرکٹ سٹیڈیم ، کولمبو میں کھیلا جائے گا۔ سری لنکن ٹیم دفاعی چیمپئن ہے۔ٹورنامنٹ میں 6 ٹیمیں ٹائٹل کے حصول کے لئے پنجہ آزمائی کریں گی جن میں پاکستان،دفاعی چیمپئن سری لنکا ،بھارت، بنگلہ دیش ، افغانستان اور نیپال شامل ہیں، ان 6 ٹیموں کو دو گروپس میں تقسیم کیا گیا ہے۔ گروپ اے میں پاکستان ، بھارت اور نیپال جبکہ گروپ بی میں دفاعی چیمپئن سری لنکا ، افغانستان اور بنگلہ دیش شامل ہیں۔ پاکستان کی ٹیم اپنا دوسرا میچ روایتی حریف بھارت کے خلاف 2 ستمبر کو کینڈی میں کھیلے گی۔ بھارتی ٹیم کو سب سے زیادہ 7 مرتبہ ٹائٹل جیتنے کا اعزاز حاصل ہے۔ سری لنکن ٹیم چھ مرتبہ ٹائٹل جیت چکی ہے جبکہ پاکستان کی ٹیم دو مرتبہ ٹائٹل اپنے نام کر چکی ہے
