کراچی: پاکستان کرکٹ ٹیم کے سابق کپتان سرفراز احمد نے بین الاقوامی کرکٹ سے ریٹائرمنٹ لینے کا اعلان کر دیا ہے۔
انہوں نے اپنے طویل اور کامیاب کیریئر کے دوران پاکستان کے لیے کرکٹ کی تینوں طرز میں نمایاں خدمات انجام دیں۔
سرفراز احمد نے قومی ٹیم کی نمائندگی کرتے ہوئے 54 ٹیسٹ، 117 ایک روزہ بین الاقوامی اور 61 مختصر دورانیے کے بین الاقوامی میچز کھیلے۔ اس دوران انہوں نے مجموعی طور پر 6164 رنز بنائے، جبکہ بطور وکٹ کیپر 315 کیچز اور 56 اسٹمپنز بھی کیے۔
سرفراز احمد کو قومی ٹیم کی قیادت کا اعزاز بھی حاصل رہا۔ انہوں نے مجموعی طور پر 100 بین الاقوامی میچز میں پاکستان ٹیم کی کپتانی کی۔ ان کی قیادت میں پاکستان نے چیمپئنز ٹرافی.جیت کر عالمی کرکٹ میں بڑی کامیابی حاصل کی۔
مزید یہ کہ ان کے دورِ قیادت میں پاکستان کی مختصر دورانیے کی ٹیم عالمی درجہ بندی میں پہلی پوزیشن تک بھی پہنچی۔
سرفراز احمد کو یہ منفرد اعزاز بھی حاصل ہے کہ انہوں نے جونیئر اور سینئر دونوں سطح پر عالمی کرکٹ کونسل کے مقابلوں میں پاکستان کو کامیابی دلانے والی ٹیموں کی قیادت کی۔
حکومتِ پاکستان نے ان کی نمایاں خدمات کے اعتراف میں 2018 میں (تمغۂ حسنِ کارکردگی) سے بھی نوازا تھا۔
ریٹائرمنٹ کے اعلان کے موقع پر سرفراز احمد کا کہنا تھا کہ پاکستان کی نمائندگی کرنا ان کی زندگی کا سب سے بڑا اعزاز رہا۔ انہوں نے کہا کہ 2006 کے انیس سال سے کم عمر کھلاڑیوں کے عالمی کپ اور 2017 کی چیمپئنز ٹرافی کی فتح ان کے کیریئر کے یادگار ترین لمحات میں شامل ہیں۔
انہوں نے اپنے ساتھی کھلاڑیوں، کوچز، اہلِ خانہ اور مداحوں کی مسلسل حمایت پر شکریہ ادا کرتے ہوئے کہا کہ قومی ٹیم کی تینوں طرز کی کرکٹ میں قیادت کرنا ان کے لیے ایک خواب کی تعبیر تھا اور انہوں نے ہمیشہ بے خوف کرکٹ کھیلنے اور متحد ٹیم بنانے کی کوشش کی۔
سابق کپتان کا کہنا تھا کہ انہیں خوشی ہے کہ ان کے دور میں کئی باصلاحیت کھلاڑی سامنے آئے جن میں بابر اعظم،فخر زمان،شاہین شاہ آفریدی وغیرہ شامل ہیں ۔
انہوں نے مزید کہا کہ پاکستان کرکٹ بورڈ کی حمایت اور اعتماد ہمیشہ یاد رہے گا اور پاکستان کرکٹ ہمیشہ ان کے دل کے قریب رہے گی۔ سرفراز احمد کے مطابق وہ مستقبل میں بھی کسی نہ کسی انداز میں اس کھیل کی خدمت جاری رکھیں
