لاہور: فلم، ٹی وی اور اسٹیج کے نامور اداکار عاصم بخاری کو سپردِ خاک کر دیا گیا۔
ان کی نمازِ جنازہ میں شوبز انڈسٹری سے تعلق رکھنے والی شخصیات، اہلِ خانہ، دوست احباب اور مداحوں کی بڑی تعداد نے شرکت کی۔
مرحوم کی تدفین مقامی قبرستان میں کی گئی جہاں ان کے ایصالِ ثواب کے لیے خصوصی دعائیں بھی کی گئیں۔
اداکارعاصم بخاری کے انتقال کی خبر سامنے آنے کے بعد شوبز حلقوں میں گہرے دکھ اور افسوس کی فضا پائی گئی۔
مرحوم نے اپنے فنی کیریئر کے دوران فلم، ٹیلی ویژن اور اسٹیج کے متعدد یادگار منصوبوں میں کام کیا اور اپنی منفرد اداکاری کے باعث ناظرین کے دلوں میں خاص مقام بنایا۔
ان کی اداکاری کو ناقدین اور شائقین دونوں کی جانب سے سراہا جاتا تھا۔
عاصم بخاری کے ساتھی فنکاروں اور شوبز شخصیات نے ان کے انتقال پر گہرے دکھ اور افسوس کا اظہار کرتے ہوئے کہا کہ مرحوم ایک باصلاحیت فنکار اور خوش اخلاق انسان تھے، ان کی خدمات کو ہمیشہ یاد رکھا جائے گا۔
