اسلام آباد :وفاقی وزیر داخلہ محسن نقوی نے کہا ہے کہ 35 روز میں جناح اسکوائر انڈر پاس مکمل ہو جائے گا، اس سے اسلام آباد ائیر پورٹ سے مری تک سگنل فری کوریڈور کی سہولت ملے گی۔
وہ منگل کو جناح سکوائر مری روڈ انڈر پاس پراجیکٹ کے دورہ کے موقع پر اظہار خیال کررہے تھے۔
وزیر داخلہ محسن نقوی نے منصوبے پر جاری تعمیراتی کام کا جائزہ لیا۔ وزیر داخلہ محسن نقوی نے انڈر پاس پراجیکٹ کو ریکارڈ 35 روز میں مکمل کرنے کی ہدایت دی۔
ان کا کہنا تھا کہ سپیڈ کے ساتھ ساتھ معیار کو ہرصورت برقرار رکھا جائے۔ وزیر داخلہ نے شہریوں کی آمدورفت کیلئے متبادل راستہ پر ٹریفک کی روانی برقرار رکھنے کی ہدایت دی۔
وزیر داخلہ نے کہا کہ اسلام آباد ایئرپورٹ سے مری تک سگنل فری کوریڈور سے شہریوں کو آمدورفت میں بہت آسانی ہو گی۔ اسلام آباد میں ٹریفک جام رہنے کا برسوں پرانا مسئلہ حل ہوگا اور سیاحوں کو مری پہنچنے میں آسانی ہو گی پراجیکٹ کشمیر چوک کے قریب ٹریفک رش کو کم کرنے میں بھی معاون ثابت ہو گا۔
انہوں نے کہا کہ شہر میں ٹریفک کے مجموعی نظام کو بہتر بنانے میں مدد ملے گی۔ وقت کے ساتھ ایندھن کی بھی بچت ہو گی۔
چیئرمین سی ڈی اے محمد علی رندھاوا نے وزیر داخلہ کو منصوبے پر ہونے والی پیش رفت پر بریفنگ دیتے ہوئے بتایا کہ پراجیکٹ کے سٹرکچر اور روڈ نیٹ ورک پر کام تیزی سے جاری ہے، انشاءاللہ منصوبے کو مقررہ وقت میں مکمل کیا جائے گا۔اس
منصوبے میں 479 میٹر طویل انڈر پاس شامل ہے، اسے 3 ٹریفک لین کو ایڈجسٹ کرنے کے لیے ڈیزائن کیا گیا ہے، ملحقہ پل کو چوڑا کرنا بھی اس منصوبے کا حصہ ہے، دونوں اطراف میں 2 لین کا اضافہ کیا جائے گا۔منصوبے سے ملحقہ چار سلپ روڈز کو بھی کشادہ کیا جائے گا۔
