اسلام آباد:وزیراعظم محمد شہباز شریف نے کویت کے قومی دن اور یوم آزادی کے موقع پر امیر کویت شیخ مشعل الاحمد الجابر الصباح ،وزیر اعظم شیخ عبداللہ الاحمد الصباح اور کویت کے عوام کو مبارکباد دی ہے۔
وزیراعظم نے اپنے تہنیتی پیغام میں کہا کہ وہ امیر کویت شیخ مشعل الاحمد الجابر الصباح اور وزیر اعظم شیخ عبداللہ الاحمد الصباح کو کویت کی حکومت اور برادر ریاست کویت کے قومی دن اور یوم آزادی کے موقع پر دلی مبارکباد پیش کرتا ہوں۔
انہوں نے کہا کہ اس پرمسرت موقع پر ہم غیر ملکی جارحیت سے اپنی آزادی کا جشن منانے میں کویتی عوام کے ساتھ ہیں۔
انہوں نے کہا کہ پاکستان اور کویت کے دوطرفہ تعلقات ہماری مشترکہ تاریخ، مذہب اور ثقافت پر مبنی ہیں۔ ہم ہر مشکل وقت میں ایک دوسرے کے ساتھ کھڑے ہیں.
ہم اپنے تعلقات کو نئی بلندیوں تک پہنچانے، باہمی طور پر مفید تعاون کو بڑھانے اور علاقائی امن اور خوشحالی کے لیے کویت کی قیادت کے ساتھ مل کر کام کرنے کے لئے تیار ہیں۔
