لندن :سکواش کے نوجوان کھلاڑی سہیل عدنان نے 18 سال بعد برٹش جونیئر اوپن سکواش چیمپئن شپ 2025 میں انڈر 13 ٹائٹل جیت کر قوم کا سر فخر سے بلند کر دیا۔
سہیل عدنان نے فائنل میں مصر کے ایلموغازی کو 3-2 سے شکست دی جس میں ان کے جیت کا گیم اسکور 11-5، 5-11، 6-11، 11-7، 11-5تھا۔
برٹش جونیئر اوپن سکواش انڈر 13 میں 18 سال بعد کامیابی حاصل کی ہے جس نے اسکواش میں ملک کے سنہری دور کی یادیں تازہ کر دیں،اس سے قبل ٹورنامنٹ میں جیتنے والے آخری پاکستانی 2007 میں ناصر اقبال تھے۔
سہیل عدنان کے عزم اور غیر معمولی مہارت نے شائقین کو مسحور کر دیا۔پاکستان سکواش فیڈریشن (پی ایس ایف) نے سہیل عدنان کی فتح کو کھیل میں قوم کی بحالی کے لیے امید کی کرن قرار دیا۔
پی ایس ایف کے ترجمان نے کہا کہ یہ جیت سہیل عدنان کی محنت اور پاکستان کے اسکواش ٹیلنٹ کی صلاحیت کا منہ بولتا ثبوت ہے۔
