لاہور : لاہور قلندرز پی ایس ایل کے مسلسل چھٹے میچ میں بھی ہار گئی ۔
قذافی اسٹیڈیم میں 14ویں میچ میں ملتان سلطانز نے اسے 60 رنز سے مات دے دی۔
ملتان سلطانز نے ٹاس جیت کر پہلے بیٹنگ کرنے کا فیصلہ کیا۔ عثمان خان نے پہلے 40 رنز بنانے والے ریزا ہینڈرکس کے ساتھ 70، پھر 21 رنز بنانے والے طیب طاہر کے ساتھ 77 جبکہ افتخار احمد کے ساتھ 60 رنز کی پارٹنرشپ بنا کر ٹیم کا ٹوٹل 200 سے اوپر پہنچا دیا۔
عثمان خان 55 گیندوں پر 96 رنز کی اننگز کھیل کر آخری اوور میں شاہین آفریدی کی گیند پر کیچ آؤٹ ہوئے جبکہ افتخار احمد 18 گیندوں پر 20 رنز بنا کر ناٹ آؤٹ رہے اور خوشدل شاہ نے ناقابلِ شکست 3 رنز بنائے۔
ملتان سلطانز نے مقررہ 20 اوورز میں 4 وکٹوں کے نقصان پر 214 رنز بنائے۔
لاہور قلندرز کی جانب سے شاہین آفریدی نے دو جبکہ کارلوس بریتھویٹ اور سکندر رضا نے ایک ایک وکٹ لی۔
لاہور قلندرز کی پوری ٹیم 17ویں اوور میں 154 رنز بنا کر آؤٹ ہوگئی۔
قلندرز کی جانب سے صاحبزادہ فرحان نے 31، روسی وینڈر ڈوسن نے 30 اور فخر زمان نے 21 رنز کی اننگز کھیلی جبکہ کارلوس بریتھویٹ 14 رنز بنا کا ناٹ آؤٹ رہے۔ دیگر کھلاڑیوں میں سکندر رضا 17 اور کامران غلام 12 رنز بنا کر آؤٹ ہوئے۔
ملتان سلطانز کی جانب سے اسامہ میر نے 40 رنز دے کر 6 وکٹیں لیں۔
