ہمبنٹوٹا : پاکستان نے ون ڈے سیریز کے دوسرے میچ میں افغانستان کو سنسنی خیز مقابلے کے بعدایک وکٹ سے ہرادیا۔
سری لنکا کے شہر ہمبنٹوٹا میں پاکستان نے نسیم شاہ کی اہم اننگز کی بدولت 49.5 اوورز میں آخری وکٹ پر ہدف حاصل کرلیا۔
افغانستان نے ٹاس جیت کر پہلے بیٹنگ کا فیصلہ کیا افغان اوپنرز نے ٹیم کو 227 رنز کا عمدہ آغاز فراہم کیا اور افغان ٹیم نے مقررہ 50 اوورز میں 5 وکٹوں کے نقصان پر 300 رنز بنائے۔ جواب میں قومی ٹیم نے 301 رنز کا ہدف 49.5 اوورز میں آخری وکٹ پر حاصل کرلیا۔
افغان اوپنر رحمٰن اللہ گرباز نے 151 رنز کی شاندار اننگز کھیلی اور شاہین آفریدی کا شکار بنے، رحمٰن اللہ گرباز کی اننگز میں 3 چھکے اور 14 چوکے شامل تھے جب کہ دوسرے اوپنر ابراہیم زادران 80 رنز بنا کر اسامہ میر کا شکار بنے۔
پاکستان کی جانب سے نسیم شاہ نے 9 اوورز میں 45 رنز دے کر ایک وکٹ حاصل کی، اسامہ میر نے 10 اوورز میں 61 رنز دے کر ایک وکٹ حاصل کی، حارث رؤف نے 7 اوورز میں 48 اور شاداب خان نے 10 اوورز میں 53 رنز دیے۔
301 رنز کے ہدف کے تعاقب میں قومی ٹیم کے اوپنرز نے بھی محتاط انداز اپنایا اور ٹیم کو 52 رنز کی شراکت فراہم کی، 30 کے انفرادی اسکور پر فخر زمان فضل حق کی گیند پر بولڈ ہوگئے۔
ان کے بعد کپتان بابر اعظم آئے جنہوں نے امام الحق کے ساتھ مل کر ٹیم کا اسکور 170 رنز تک پہنچا دیا، بابر بھی فضل حق کا شکار بنے، انہوں نے 53 رنز کی اننگز کھیلی ۔
آغاسلمان 14 رنز بناکر آؤٹ ہوئے، محمد رضوان بھی صرف 2 رنز بناسکے، امام الحق91 رنز بنا کر آؤٹ ہوئے، شاداب خان نے جارحانہ اننگز کھیلی اور 35 گیندوں پر 48 رنز بنائے اور رن آؤٹ ہوگئے۔آخری لمحات میں نسیم شاہ نے ایک بار پھر وننگ اننگز کھیلی، انہوں نے قیمتی 10 رنز بنائے ۔
افغانستان کی جانب سے فضل حق فاروقی نے 3، محمد نبی نے 2 ،مجیب الرحمٰن اور عبدالرحمٰن نے ایک ایک کھلاڑی کو آؤٹ کیا۔
