ہمبنٹوٹا:پاکستان اور افغانستان کی کرکٹ ٹیموں کے درمیان تین ایک روزہ بین الاقوامی میچوں پر مشتمل سیریز کا پہلا میچ (کل) منگل کوسری لنکا میں کھیلا جائے گا۔
میچ ڈے اینڈ نائٹ ہوگا اور پاکستان کے معیاری وقت کے مطابق سہ پہر دو بجکر 30 منٹ پر شروع ہوگا۔پاکستان اور افغانستان کی ٹیمیں ان دنوں سری لنکا میں موجود ہیں جہاں وہ تین ون ڈے میچوں کی سیریز کھیلیں گی۔ پاکستان کرکٹ ٹیم کی قیادت مایہ ناز بلے باز بابر اعظم کریں گے جبکہ افغانستان کی ٹیم کو حشمت اللہ شہیدی لیڈ کریں گے۔ آئی سی سی نے دونوں ٹیموں کے درمیان ون ڈے سیریز کیلئے 7 رکنی کمنٹری پینل کا اعلان کردیا ہے۔
پینل میں پاکستان کرکٹ ٹیم کے مایہ ناز بلے باز اور سابق کپتان عامر سہیل، رمیز راجا ، ایچ ڈی ایکرمین، ڈیوڈ گرور، ماہاروف، فرہد فدائی اور دویندر کمار شامل ہیں۔پاکستان اور افغانستان کے درمیان سری لنکا میں تین ون ڈے میچز کی سیریز کیلئے میزبان افغانستان کی جانب سے شائقین کیلئے مفت داخلے کا اعلان کردیا گیا، تینوں ون ڈے میچز میں شائقین بغیر ٹکٹ سٹیڈیم جاکر میچ دیکھ سکیں گے۔
واضح رہے کہ پاکستان اور افغانستان کے درمیان پہلا ون ڈے 22 اگست کو کھیلا جائے گا، دوسرا میچ 24 جبکہ تیسرا اور آخری ون ڈے میچ 26 اگست کو کھیلا جائےگا۔سیریز کے تینوں میچز ڈے اینڈ نائٹ ہوں گے اور سری لنکا کے مہندا راجا پاکسا انٹرنیشنل سٹیڈیم، ہمبنٹوٹا میں کھیلے جائیں گے۔
