خانہ کعبہ کا غلاف تبدیل کر دیا گیا

مکه مکرمه : خانہ کعبہ کا غلاف تبدیل کر دیا گیا، کنگ عبدالعزیز کمپلیکس سے غلاف خصوصی ٹرکوں کے ذریعے بیت اللہ شریف لایا گیا، کسوہ فیکٹری کے حکام نے غلاف کعبہ حرمین شریفین انتظامی امور کے سر براہ الشیخ عبد الرحمان السدیس کے حوالے کیا جبکہ تبدیلی کی تقریب نماز عشاء کے بعد شروع کی گئی ، کسوہ فیکٹری کے ماہر کاریگر غلاف کعبہ کی تبدیلی میں شریک ہوئے جبکہ ہزاروں عمرہ زائرین اور نمازی روح پرور تقریب میں شریک تھے ، پاکستان سمیت دیگر ممالک کے سفارتی افسران غلاف کعبہ کی تبدیلی کی تقریب دیکھنے کے لئے موجود رہے ، غلاف کعبہ مجموعی طور پر 16 ٹکڑوں پر مشتمل ہے ، کسوہ کی لمبائی 50 فٹ اور چوڑائی 35 سے 40 فٹ ہے جبکہ غلاف کعبہ کا وزن 850 کلوگرام ہے اور اس کی تیاری میں 25 ملین ریال لاگت آتی ہے ، غلاف کعبہ میں تقریباً 700 کلوگرام خالص ریشم، 300 کلو گرام کاٹن، 100 کلوگرام چاندی کا دھاگہ اور 120 کلوگرام چاندی کے تار کا استعمال کیا جاتا ہے ۔ سیاہ رنگ کے غلاف پر آیات مبارکہ کے 54 سنہری حصے بھی شامل ہیں، غلاف کعبہ کی تبدیلی کی تقریب فجر تک جاری رہی۔