اسلام آباد:نیشنل الیکٹرک پاور ریگولیٹری اتھارٹی (نیپرا) نے کے۔الیکٹرک کیلئے مارچ کیلئے ماہانہ فیول پرائس ایڈجسٹمنٹ سے متعلق عوامی سماعت مکمل کر لی۔ بدھ کو نیپرا کی طرف سے جاری اعلامیہ میں کہا گیا ہے کہ عوامی سماعت چیئرمین نیپرا انجینئر توصیف ایچ فاروقی کی زیر صدارت ہوئی۔ سماعت میں نیپرا ممبران ، انجینئر رفیق احمد شیخ ، انجینئر مقصود انور خان ، مطہر نیاز رانا اور آمنہ احمد بھی موجود تھے۔اعلامیہ کے مطابق کے ۔الیکٹرک نے ایف سی اے کی مد میں 4 روپے 49 پیسے فی یونٹ اضافہ کی درخواست جمع کرائی تھی، نیپرا کی ڈیٹا کی جانچ پڑتال کے مطابق مارچ کے ایف سی اے کی مد میں اضافہ 3روپے 70 پیسے فی یونٹ بنتا ہے ، اس کا اطلاق صرف ایک ماہ کے لئے ہو گا، اس کا اطلاق کے ۔الیکٹرک کے تمام صارفین ماسوائے لائف لائن اور الیکٹرک وہیکل چارجنگ سٹیشنز پر ہوگا۔ اعلامیہ کے مطابق اتھارٹی ڈیٹا کی مزید جانچ پڑتال کے بعد اپنا تفصیلی فیصلہ جاری کرے گی۔
