اسلام آباد: پاکستان مسلم لیگ کے صدر و سابق وزیراعظم چوہدری شجاعت حسین نے ڈاکٹر شکیل روشن کو پاکستان مسلم لیگ بلوچستان کا صوبائی صدر مقرر کر دیا ہے۔ اس سلسلہ میں بدھ کو باضابطہ نوٹیفکیشن جاری کر دیا گیا ہے۔ ڈاکٹر شکیل روشن نے چوہدری شجاعت حسین سے ملاقا ت کی۔ اس موقع پر پارٹی کے چیف آرگنائزر چوہدری سرور، چوہدری شافع حسین اور مصطفیٰ ملک بھی موجود تھے ۔ چوہدری شجاعت حسین نے ڈاکٹر شکیل روشن کو پارٹی کو ازسر نو منظم کرنے کی ہدایت کی ۔ ڈاکٹر شکیل روشن کا شمار مسلم لیگ کے نظریاتی رہنماوں میں کیا جاتا ہے، ڈاکٹر شکیل روشن نے سیاسی سفر کا آغاز ایم ایس ایف سے کیا ، وہ مسلم لیگ یوتھ ونگ کے مرکزی صدر بھی رہے ہیں، ڈاکٹر شکیل روشن پی ایچ ڈی سکالر اور کئی تعلیمی اداروں کے بانی بھی ہیں۔چوہدری شجاعت حسین نے شکیل روشن کو ہدایت کی کہ وہ مسلم لیگ کے نظریاتی ورکروں کو اعتماد میں لیں،پاکستان دوست شخصیات کو پارٹی میں شامل کیا جائے ۔چوہدری سرور نے کہا کہ ڈاکٹر شکیل روشن کی نامزدگی سے پارٹی کو پڑھی لکھی قیادت ملے گی ۔ چوہدری شافع حسین نے کہا کہ پورے ملک میں پارٹی کو منظم اور فعال ، بلوچستان کا احساس محرومی ختم کریں گے۔مصطفی ملک نے کہا کہ بلوچستان کے تنظیمی ساتھی مخلص اور پارٹی کے وفادار ہیں، ڈاکٹر شکیل تمام راہنماؤں سے مشاورت یقینی بنائیں گے۔ ڈاکٹر شکیل روشن نے کہا کہ بلوچستان کو پارٹی کا قلعہ بنائوں گا، سب کو ساتھ لے کر چلوں گا، قیادت کے اعتماد کا شکریہ ادا کرتا ہوں.
