مکہ المکرمہ: حج کے مناسک کی کامیاب ادائیگی کے بعد دنیا بھر سے آئے ہوئے لاکھوں حجاج کرام مسجد الحرام میں طوافِ وداع ادا کر رہے ہیں۔ بیت اللہ سے رخصتی کے یہ لمحات حجاج کے لیے انتہائی جذباتی اور یادگار ثابت ہو رہے ہیں۔
حجاج کرام کعبۃ اللہ کے گرد طواف کرتے ہوئے اشک بار آنکھوں کے ساتھ اپنے رب کے حضور دعائیں مانگ رہے ہیں اور دوبارہ حاضری کی تمنا کا اظہار کر رہے ہیں۔ مسجد الحرام میں روح پرور مناظر دیکھنے میں آ رہے ہیں جہاں ہر طرف عبادت، دعا اور خشوع و خضوع کی کیفیت نمایاں ہے۔
سعودی جنرل اتھارٹی اور سیکیورٹی اداروں کی جانب سے کیے گئے مؤثر انتظامات کے باعث مطاف اور مسجد الحرام کی بالائی منزلوں میں لاکھوں افراد کی موجودگی کے باوجود آمد و رفت کا نظام انتہائی منظم اور پُرسکون رہا۔
حجاج کرام نے محفوظ اور سہولتوں سے آراستہ ماحول میں اپنے مقدس سفر کا آخری مرحلہ مکمل کیا، جسے وہ اپنی زندگی کے یادگار ترین لمحات میں شمار کر رہے ہیں۔
