اسلام آباد: نیشنل بینک آف پاکستان کے "اعتماد اسلامی ایڈوانس سیلری” کو عالمی سطح پر تسلیم کرتے ہوئے Qorus Reinvention Award 2025 میں سلور ایوارڈ سے نوازا گیا ہے۔ یہ اعزاز دبئی میں منعقدہ Qorus Reinvention Award کی تیسری سالانہ تقریب میں دیا گیا، جس کا مقصد مشرق وسطیٰ اور افریقہ (MEA) ریجن میں تخلیقی اور انقلابی مالیاتی خدمات کو سراہنا ہے۔
اعتماد اسلامک ایڈوانس سیلری کو ڈسٹری بیوشن کیٹیگری میں اس کے منفرد تصور، مستحکم اثرات اور انڈسٹری کے پہلے اسلامی پروڈکٹ کی کامیاب عمل درآمد پر منتخب کیا گیا۔
تقریب اور Qorus کے بارے میں
رواں سال تقریب میں دنیا کے معروف بینکوں اور انشورنس کمپنیوں سے تقریباً 600 شرکاء نے شرکت کی۔
1971 میں قائم ہونے والا Qorus ایک عالمی نان پروفٹ ادارہ ہے جو 120 ممالک میں موجود 1200 سے زائد مالیاتی اداروں کو ایک پلیٹ فارم پر یکجا کرتا ہے۔ یہ ادارہ تحقیق، تجزیہ، ڈیٹا اور کمیونٹی نیٹ ورک کے ذریعے مالیاتی صنعت میں جدت اور تعاون کو فروغ دیتا ہے۔
این بی پی قیادت کا ردعمل
این بی پی کے صدر و سی ای او رحمت علی حسنی نے ٹیم کو مبارکباد دیتے ہوئے کہا کہ یہ اعزاز شریعہ بورڈ کی رہنمائی، ریگولیٹرز کے تعاون اور پوری این بی پی فیملی کی محنت کا اعتراف ہے۔
انہوں نے کہا کہ اعتماد اسلامک ایڈوانس سیلری اسلامی بینکاری کے اعلیٰ معیار، صارفین کی سہولت اور مالی شمولیت کے مشن کو آگے بڑھاتا ہے۔
اعتماد اسلامک بینکنگ گروپ کے گروپ چیف فواد فرخ نے کہا کہ عالمی سطح پر یہ اعتراف این بی پی کے شریعہ کمپلائنٹ سلوشنز، جدت اور صارفین کی ضروریات کو ترجیح دینے کے عزم کی واضح مثال ہے۔
این بی پی کا وژن
این بی پی جدت پر مبنی ترقی کے سفر کو تیزی سے آگے بڑھا رہا ہے، اور یہ ایوارڈ بینک کے اس وعدے کو مزید مضبوط کرتا ہے کہ وہ صارفین کو قابلِ اعتماد، آسان اور دیرپا اثرات رکھنے والے مالیاتی حل فراہم کرتا رہے گا۔
