اسلام اباد : وفاقی وزیر آبی وسائل سید خورشید احمد شاہ نے کہاہے کہ ترازو کے پلڑے برابر کئے بغیر عدل کا دعوی بے معنی ہے اور پارلیمنٹ کی تحقیر سے کسی ادارے کے قد کاٹھ میں اضافہ نہیں ہوگا۔ یہاں ایک بیان میں انہوں نے کہا کہ عدل کے اداروں کو سیاست میں طرف داری کے تاثر سے باز رہنا ہوگا۔ انہوں نے کہا کہ ایک شخص کو سسلین مافیا اور گارڈ فادر کا لقب دینا اور دوسرے کو صادق اور امین کا لقب دینا عدل و انصاف کے منافی ہے۔ انہوں نے کہا کہ اس وقت پوری قوم میں یہ تاثر ہے کہ چہرے دیکھ کر انصاف ہورہا ہے۔ انہوں نے کہا دوہرا معیار عدل و انصاف کیلئے زہر قاتل ہے اور ہم دیکھ رہے ہیں کہ اس وقت پورا ملک اس زہر کی لپیٹ میں ہے۔ انہوں نے کہا کہ زنجیر عدل تک مخصوص لوگوں کی رسائی سے جگ ہنسائی ہو رہی ہے۔ انہوں نے کہا بیٹے سے تنخواہ نہ لینا اور خط نہ لکھنا رائی کے برابر مسئلے تھے مگر ان کی پاداش میں دو منتخب وزائے اعظم کو گھر بھیج دیا گیااور دوسری طرف پہاڑ جیسی چوریوں، بددیانتیوں، جھوٹ اور دھوکے بازیوں پر مکمل خاموشی ہے۔ انہوں نے کہا اداروں کے ذریعے چھوٹے صوبوں میں احساس محرومی کو جنم دینے کی ہر کوشش کا بھرپور مقابلہ کیا جائے گا اور ہم صوبوں کو دئے گئے اختیارات کو سلب کرنے کی کسی سازش کامیاب نہیں ہونے دیں گے۔ انہوں نے کہا اس وقت ہماری اولین ترجیح معیشت کی بحالی ہے اور اس ضمن میں ملکی اور بین الاقوامی سطح پر کی گئی حکومتی کوششیں بار اور ثابت ہوں گی۔
