اسلام آباد: سپریم کورٹ نے پنجاب میں انتخابات کے لیے قائم مقام گورنر سٹیٹ بینک کو الیکشن کمیشن کو براہ راست فنڈز جاری کرنے کا حکم دے دیا ہے۔
پنجاب میں انتخابات کیلئے فنڈز کے اجرا کے معاملے پر چیف جسٹس کی سربراہی میں ان چیمبر سماعت کی
ان چیمبر سماعت بینچ کےارکان چیف جسٹس عمر عطا بندیال جسٹس اعجازالاحسن اور جسٹس منیب اختر نے کی ۔
ڈپٹی گورنر سٹیٹ بینک ،سپیشل سیکرٹری خزانہ، ایڈیشنل سیکرٹری خزانہ ، اٹارنی جنرل، سیکرٹری الیکشن کمیشن، وزارت خزانہ اور اسٹیٹ بینک کے دیگر افسران چیمبر میں پیش ہوئے۔
ذرائع کے مطابق ججز نے الیکشن کے لیے فنڈز جاری نہ کرنے پر برہمی کا اظہار کیا عدالت کا کہنا تھا کہ عدالتی حکم پرعمل کرنا ہی پڑے گا۔
ذرائع کے مطابق اٹارنی جنرل کو عدالت کی طرف سے سخت سوالات کا سامنا کرنا پڑا۔
اٹارنی جنرل کا کہنا تھا کہ وفاقی حکومت نے سپریم کورٹ کے حکم پر فیڈرل کنسولیڈیٹڈ فنڈز سے رقم کے لیے بل پارلیمنٹ میں پیش کیا، پارلیمنٹ نے انتخابات کے لیے فیڈرل کنسولیڈیٹڈ فنڈزکے اجرا کے بل کو مسترد کر دیا، پارلیمنٹ سے بل مسترد ہونے کے بعد حکومت سٹیٹ بینک کو فنڈز کے اجرا کا نہیں کہہ سکتی۔
ذرائع کے مطابق سپریم کورٹ نے قائم مقام گورنر اسٹیٹ بینک کو الیکشن کمیشن کو براہ راست فنڈز جاری کرنے کا حکم دے دیا ہے۔
