بوسان: چین کے صدر شی جن پھنگ نے کہا ہے کہ چین دنیا کے مختلف ممالک کے ساتھ مل کر امن و ترقی پر مبنی ایشیا پیسیفک کمیونٹی کی تشکیل کے لیے کام کرنے کا خواہاں ہے تاکہ خطے اور دنیا بھر میں ترقی و استحکام کو نئی توانائی فراہم کی جا سکے۔
صدر شی جن پھنگ نے ایشیا پیسیفک اکنامک کوآپریشن (اے پیک) سی ای او سمٹ سے خطاب کرتے ہوئے اعلان کیا کہ چین اگلے سال تیسری مرتبہ اے پیک اجلاس کی میزبانی کرے گا، اور تمام ممالک کے ساتھ مل کر علاقائی تعاون کو مزید مضبوط بنائے گا۔
صدر شی نے اپنے خطاب میں تعاون کے چار نکات پر زور دیا:
1. امن و استحکام کے تحفظ کو اولین ترجیح دی جائے۔
2. کھلے پن اور باہمی روابط کو فروغ دیا جائے۔
3. باہمی مفاد اور مشترکہ کامیابی کے اصول پر عمل کیا جائے۔
4. جامع اور متوازن ترقی کو آگے بڑھایا جائے تاکہ کوئی ملک پیچھے نہ رہ جائے۔
صدر شی نے کہا کہ چین طویل عرصے سے عالمی اقتصادی ترقی کا اہم محرک رہا ہے۔ “چودھویں پانچ سالہ منصوبے” کے دوران چین کی معیشت کی اوسط سالانہ ترقی کی شرح 5.5 فیصد رہی، جب کہ عالمی معیشت میں چین کا حصہ تقریباً 30 فیصد تک پہنچ گیا۔
انہوں نے کہا کہ چین عالمی کاروباری برادری کے لیے ایک محفوظ، کھلا اور متحرک سرمایہ کاری کا مرکز ہے۔ ملک میں ابھرتی ہوئی صنعتوں، اختراع اور سبز توانائی کے شعبے میں تیزی سے ترقی ہو رہی ہے۔ چین نے دنیا کا سب سے بڑا قابلِ تجدید توانائی نظام اور سب سے مکمل نئی توانائی کی صنعتی زنجیر قائم کی ہے، جو عالمی کاروبار کے لیے سبز ترقی کے مواقع فراہم کرے گی۔
صدر شی جن پھنگ نے کہا کہ “چین کے ساتھ سفر کرنا دراصل مواقع کے ساتھ سفر کرنا ہے، چین پر یقین رکھنا مستقبل پر یقین رکھنا ہے، اور چین میں سرمایہ کاری کرنا مستقبل میں سرمایہ کاری کرنا ہے۔”
