اسلام آباد:وفاقی وزیر داخلہ محسن نقوی نے لندن میں سابق چیف جسٹس قاضی فائز عیسی اور پاکستانی ہائی کمیشن کی گاڑی پر حملے کے افسوسناک واقعہ کی شدید الفاظ میں مذمت کی ہے اور نادرا کو حملہ آوروں کی شناخت کے لئے فوری اقدامات کا حکم دیا ہے ۔
اپنے بیان میں وزیر داخلہ محسن نقوی نے نادرا کو ہدایت دی کہ فوٹیجز کے ذریعے حملہ آوروں کی نشاندہی کی جائے۔ زحملہ آوروں کے خلاف قانونی کارروائی کی جائے گی۔ پاکستان میں ایف آئی آر درج کرکے مزید کارروائی کی جائے گی۔
وفاقی وزیر داخلہ نے کہا کہ حملہ آوروں کے شناختی کارڈ بلاک اور پاسپورٹ منسوخ کئے جائیں گے، جنہوں نے حملہ کیا ہے ان کی شہریت منسوخ کرنے کےلئے فوری کارروائی کی جائے گی۔
وفاقی وزیرداخلہ محسن نقوی نے کہا کہ شہریت منسوخی کا کیس منظوری کے لئے کابینہ بھیجا جائے گا۔ انہوں نے واضح کیا کہ کسی کو بھی اس طرح کے حملے کی اجازت نہیں دی جا سکتی، لندن میں پاکستانی ہائی کمشن کی کار پر حملہ ہوا ہے۔ ہم اس واقعہ پر خاموش نہیں بیٹھ سکتے۔
وفاقی وزیر داخلہ محسن نقوی نے اس بات پر زور دیا کہ سابق چیف جسٹس قاضی فائز عیسی کو دھمکیوں کا سامنا تھا تو سکیورٹی کیوں فراہم نہیں کی گئی۔
