اسلام آباد: نیشنل الیکٹرک پاور ریگولیٹری اتھارٹی (نیپرا) نے اگست کے ماہانہ فیول چارجز ایڈجسٹمنٹ (ایف سی اے)کی مد میں 86 پیسے فی یونٹ کمی کی منظوری دے دی ہے۔
ترجمان نیپرا کے مطابق سینٹرل پاور پرچیزنگ ایجنسی گارنٹی (سی پی پی اے جی) نے پاور ڈسٹریبیوشن کمپنیز (ڈسکوز) کی جانب سے ایف سی اے کی مد میں 57 پیسے فی یونٹ کمی کی درخواست جمع کروائی تھی جس پر اتھارٹی نے 26 ستمبر 2024 کوعوامی سماعت کی تھی۔ ترجمان نے کہا کہ اس سے قبل جولائی کی فیول چارجز ایڈجسٹمنٹ 37 پیسے فی یونٹ کمی کے ساتھ اگست کے بلوں میں چارج کیا گیا تھا۔ انہوں نے کہا کہ اگست کا ایف سی اے جولائی کی نسبت صارفین سے مزید 49 پیسے فی یونٹ کم چارج کیا جائے گا، یہ ریلیف صارفین کو اکتوبر کے بلوں میں دیا جائے گا، جن صارفین کو بل موصول ہو چکے ہیں انہیں یہ ریلیف نومبر کے بلوں میں دیا جائے گا۔ ترجمان نے کہا کہ اس کا اطلاق ڈسکوز کے تمام صارفین ماسوائے لائف لائن ، پری پیڈ صارف ، الیکٹرک وہیکل چارجنگ اسٹیشنز اور کے الیکٹرک صارفین پر ہوگا۔
