اسلام آباد:فیڈرل بورڈ آف ریونیو نے فعال ٹیکس گزاروں کی فہرستی نظام کومزیدفعال بنانے کیلئے انکم ٹیکس کے قواعد میں میں اہم ترامیم کی ہے، ترامیم کے تحت ایکٹیو ٹیکس پیئرز لسٹ کو ہفتہ وار کے بجائے اب روزانہ کی بنیاد پر اپ ڈیٹ کیا جائے گا۔
ایف بی آر کے ترجمان نے جمعرات کویہاں جاری بیان میں کہاہے کہ یہ ترامیم ایس آراو کے زریعہ کی گئی ہے ۔ اس طریقہ کار سے ٹیکس دہندگان انکم ٹیکس گوشوارے جمع کرانے پر فوری طور پر ایکٹیو ٹیکس پیئرز لسٹ میں شامل ہو سکیں گے، جس سے ریئل ٹائم ایکیوریسی میں بہتری آئے گی اور ٹیکس کی تعمیل میں سہولت ملے گی۔ وہ ٹیکس دہندگان جو ٹیکس سال (2024) کے لیے اپنے انکم ٹیکس گوشوارے مقررہ تاریخ تک، یا دی گئی کسی توسیع کے اندر، جمع کرائیں گے، انہیں فوراً ایکٹیو ٹیکس پیئرز لسٹ میں شامل کردیا جائے گا۔ علاوہ ازیں مقررہ یا توسیعی تاریخ کے بعد گوشوارے جمع کرنے والے ٹیکس دہندگان انکم ٹیکس آرڈیننس کے سیکشن 182A کے تحت سرچارج کی ادائیگی پر ایکٹیو ٹیکس پئیرز لسٹ میں شامل ہو سکیں گے۔ پرانے نظام کے تحت ایکٹیو ٹیکس پیئرز لسٹ کو ہر سال مارچ میں اپڈیٹ کیا جاتا تھا، جس کو تبدیل کردیا گیا ہے اور اب انکم ٹیکس گوشوارہ جمع کرانے پر ٹیکس دہندہ کو فوری طور پر ایکٹیو ٹیکس پیئرز لسٹ میں شامل کر دیا جائے گا جس سے پراسس مزید مؤثر اور ٹیکس کمپلائنس بہتر ہو جائے گی۔ترجمان نے بتایا کہ یہ ترامیم ایف بی آر آپریشنز کی کارکردگی کو بہتر اور شفافیت کو یقینی بنا نے کی عکاسی کرتی ہیں۔ ایکٹیو ٹیکس پیئرز لسٹ اپ ڈیٹس کے لیے زیادہ متحرک طریقہ اختیار کر کے ایف بی آر، ٹیکس دہندگان اور تمام اسٹیک ہولڈرز کو سہولیات فراہم کرنے کے لیے پرعزم ہے۔
