ایپوہ : پاکستانی ہاکی ٹیم سلطان اذلان شاہ ہاکی ٹورنامنٹ کا فائنل ہار کر بھی جیت گئی.
ملائیشیا کے شہر ایپوہ میں کھیلا گیا فائنل میچ چوتھے کوارٹر میں 2 -2 گول سے برابر رہا جس کے بعد پینالٹی شوٹ آؤ ٹ پر فیصلہ ہوا۔
جاپان نے پینالٹی شوٹ آؤ ٹ مقابلہ 1-4 سے جیت کر پہلی بار اذلان شاہ ہاکی ٹورنامنٹ کا ٹائٹل حاصل کرلیا۔ جاپان کی ٹیم نے پہلی بار اذلان شاہ کپ کا فائنل کھیلا۔
جاپان نے پہلے کوارٹر میں پاکستان کے خلاف ایک صفر کی برتری حاصل کی تاہم دوسرے کوارٹر میں دونوں ٹیمیں کوئی گول سکور نہ کرسکیں۔
تیسرے کوارٹر میں پاکستان نے 1-2 کی برتری حاصل کرلی، احمد اعجاز نے 34 ویں اور عبدالرحمان نے37 ویں منٹ میں گول کیا لیکن جاپان نے چوتھے کوارٹر میں میچ 2-2 سے برابر کردیا،جاپان کی جانب سے دوسرا گول کازوماسما نے 47 ویں منٹ میں اسکور کیا۔
چوتھے کوارٹر میں پاکستان کو برتری حاصل کرنے کے متعدد مواقع ملے تاہم فائدہ نہ اٹھایا جا سکا۔
پینالٹی شوٹ آؤٹ میں 8 سیکنڈ کے اندر گول کرنا ہوتا ہے۔ پاکستان نے 5 میں سے 2 پینالٹی شوٹ آؤٹ ضائع کیے۔
پینالٹی شوٹ آؤٹ پر پاکستان کا واحد گول عماد بٹ نےکیا، رانا وحید اشرف، ارشد لیاقت گول نہ سکور کرسکے ۔
فائنل کے مین آف دی میچ کا ایوارڈ پاکستان کے رانا وحید اشرف کے نام رہا۔ پاکستان ہاکی ٹیم ایونٹ کی سلور میڈلسٹ قرار پائی۔
یاد رہے کہ پاکستان نےگز شتہ ایونٹ میں برانز میڈل حاصل کیا تھا۔ پاکستان نے 2011 میں آخری بار اذلان شاہ ہاکی ٹورنامنٹ کا فائنل کھیلا تھا۔ پاکستان نےٹورنامنٹ آخری بار 2003 میں جیتا تھا۔
فائنل سے قبل پاکستان ٹیم ایونٹ میں ناقابل شکست رہی، پاکستان نے 3 میچ جیتے اور دو میچز برابرکھیلے۔
