اسلام آباد:وزیراعظم محمد شہباز شریف 6 اپریل سے 8 اپریل تک سعودی عرب کا دورہ کریں گے، وزیر اعظم منتخب ہونے کے بعد یہ ان کا پہلا غیر ملکی دورہ ہو گا۔
ترجمان دفتر خارجہ کی جانب سے جمعہ کو جاری بیان کے مطابق دورے کے دوران وزیر خارجہ اور دفاع کے علاوہ اطلاعات و نشریات، خزانہ اور اقتصادی امور کے وفاقی وزراء بھی ان کے ہمراہ ہونگے۔ وزیراعظم عمرہ کی ادائیگی کے علاوہ مدینہ المنورہ میں مسجد نبویؐ الشریف میں نماز ادا کریں گے۔ وزیراعظم کی سعودی عرب کے ولی عہد اور وزیراعظم شہزادہ محمد بن سلمان بن عبدالعزیز سے ملاقات متوقع ہے جس میں باہمی دلچسپی کے امور پر تبادلہ خیال کیا جائے گا۔ بیان کے مطابق دونوں ملکوں کے رہنما علاقائی اور عالمی پیش رفت پر بھی تبادلہ خیال کریں گے۔ پاکستان اور سعودی عرب کے درمیان دیرینہ برادرانہ تعلقات ہیں جن کی جڑیں مذہبی اور ثقافتی وابستگی پر ہیں۔ پاکستان کے عوام خادم الحرمین الشریفین شاہ سلمان بن عبدالعزیز السعود کے لیے انتہائی احترام رکھتے ہیں۔ دونوں ممالک کی قیادت برادرانہ تعلقات کو آگے بڑھانے اور اقتصادی اور سرمایہ کاری کے تعلقات کو باہمی طور پر فائدہ مند بنانے کے لیے پرعزم ہے۔
