لاہور: ملک احمد خان سپیکر اور ظہیر اقبال چنڑ ڈپٹی سپیکر بن گئے۔
مسلم لیگ ن کے ملک احمد خان 224 ووٹ لے کر سپیکر اور ظہیر اقبال چنڑ نے 220 ووٹ لیکر ڈپٹی سپیکر پنجاب اسمبلی منتخب ہو گئے۔
سپیکر کیلئے ملک محمد احمد خان کا مقابلہ سنی اتحاد کونسل کے احمد خان بھچر سے تھا، سپیکر کے انتخاب کیلئے 3 پولنگ بوتھ بنائے گئے تھے جہاں 327 اراکین نے ووٹ کاسٹ کئے۔
مسلم لیگ ن کے ملک احمد خان 224 ووٹ لے کر سپیکر پنجاب اسمبلی منتخب ہو گئے، ان کی جیت پر ن لیگ کے ارکان نے شیر شیر اور مریم مریم کے نعرے لگائے۔
ملک محمد احمد خان نے سپیکر کے انتخاب کے بعد عہدے کا حلف اٹھا لیاسبطین خان نے ان سے حلف لیا۔
سپیکر ملک محمد احمد خان نے عہدے کا حلف اٹھانے کے بعد ایوان کی باقی کارروائی جاری رکھی۔
ڈپٹی سپیکر کے الیکشن میں سنی اتحاد کونسل کے معین ریاض قریشی اور ن لیگ کے ظہیر اقبال چنڑ میں مقابلہ ہوا۔
معین ریاض قریشی کو 103 ووٹ ملے، ظہیر اقبال چنڑ نے ڈپٹی سپیکر کا حلف بھی اٹھا لیا۔
سپیکر اور ڈپٹی سپیکر کے انتخاب کیلئے پنجاب اسمبلی کا اجلاس ڈیڑھ گھنٹہ تاخیر کے بعد شروع ہوا جبکہ سپیکر کے انتخاب کیلئے خفیہ رائے شماری کے تحت ووٹنگ کی گئی، سپیکر پنجاب اسمبلی کے انتخابات کیلئے 327 ارکان اسمبلی نے انتخاب میں حصہ لیا۔
قبل ازیں مسلم لیگ ن کی نامزد وزیراعلیٰ مریم نواز کی آمد پر ارکان نے شور شرابہ اور نعرے بازی کی، سنی اتحاد کونسل کے ارکان نے نواز شریف کے خلاف نعرے لگائے،جواب میں مسلم لیگ ن کے ارکان نے سیٹوں پر کھڑے ہو بانی پی ٹی آئی کے خلاف نعرے لگائے۔
