راولپنڈی:سکیورٹی فورسز نے مچھ اور کولپور کمپلیکسز پر حملے کو ناکام بنا دیا،3 خود کش حملہ آوروں سمیت 9 دہشتگرد جہنم واصل جبکہ 4 جوان اور 2 شہری شہید ہوگئے۔
آئی ایس پی آر کے مطابق 29 اور 30 جنوری کی رات مچھ اور کولپور کمپلیکسز پر خودکش بمباروں سمیت متعدد دہشت گردوں نے حملہ کیا، قانون نافذ کرنے والے اداروں نے دہشت گردوں کے حملے کا موثر جواب دیا۔
علاقے میں سکیورٹی فورسز کو فوری طور پر متحرک کر دیا گیا، اب تک 3 خودکش حملہ آوروں سمیت 9 دہشت گرد جہنم واصل اور 3 زخمی ہو چکے ہیں۔
فائرنگ کے تبادلے میں قانون نافذ کرنے والے اداروں کے 4 جوان اور 2 معصوم شہری شہید ہوئے۔
آئی ایس پی آر کا کہنا ہے کہ حملے کا موثر جواب دہشت گردی کے خلاف جنگ میں بے لوث عزم کا ثبوت ہے، سکیورٹی فورسز قانون نافذ کرنے والے دیگر اداروں کے ساتھ کھڑی ہیں۔
