صدر اور الیکشن کمیشن پھر آمنے سامنے آ گئے
اسلام آباد : الیکشن کمیشن نے انتخابات ملتوی ہونے کے تاثرکی پرزور تردید کرتے ہوئے کہا ہے کہ الیکشن ملتوی ہونے کا کوئی امکان نہیں۔تمام تیاریاں مکمل ہیں اور حلقہ بندی کی حتمی اشاعت کے بعد انتخابات کے شیڈول کا اعلان کر دیا جائے گا، اس میں کسی قسم کا ابہام نہیں۔
ترجمان الیکشن کمیشن آف پاکستان کا کہنا ہے کہ صدر مملکت کے گزشتہ روز ایک پرائیوٹ چینل پر انٹرویو کے دوران الیکشن کےانعقاد بارے اظہار رائے کی وجہ سے یہ تاثر گیا ہے کہ شاید الیکشن ملتوی ہو جائیں گے ۔الیکشن کمیشن اس تاثر کو زائل کرنے کے لئے اسکی پرزور تردید کرتا ہے کہ الیکشن ملتوی ہونے کا کوئی امکان ہے ۔ اس سلسلے میں کمیشن پہلے ہی پوزیش واضح کر چکا ہے ۔ انہوں نے کہا ہے کہ حلقہ بندی کا پہلا مرحلہ مکمل ہو چکا ہے اور اعتراضات دائر کرنے کا دوسرا مرحلہ کل یعنی 27اکتوبر 2023 کو مکمل ہو جائے گا۔ اس کے ساتھ ہی ابتدائی حلقہ بندی پر اعتراضات کی سماعت الیکشن کمیشن 30/31 اکتوبر سے شروع کرے گا اور30نومبر 2023 کو الیکشن کمیشن حلقہ بندیوں کی حتمی فہرست شائع کر دے گا۔
ترجمان نے کہا کہ الیکشن کے انعقاد کے لئے ایکشن پلان کے مطابق الیکشن کمیشن کی تمام تیاریاں مکمل ہیں اور حلقہ بندی کی حتمی اشاعت کے بعد انتخابات کے شیڈول کا اعلان کر دیا جائے گا۔ اس میں کسی قسم کا ابہام نہیں۔