استور: گلگت بلتستان اسمبلی کے حلقہ جی بی ایل اے 13 استور ون کی نشست پر پولنگ جاری ہے، اصل مقابلہ ن لیگ، پیپلز پارٹی اور پی ٹی آئی کے درمیان ہو گا۔
9 آزاد امیدواروں سمیت 14 امیدوار میدان میں ہیں۔
تحریک انصاف کی جانب سے خورشید احمد خان، مسلم لیگ (ن) کے رانا فرمان علی جبکہ پیپلز پارٹی کے عبد الحمید خان اسی طرح عنایت اللہ میر جمعیت علمائے اسلام کے بینر تلے جبکہ عطا اللہ تحریک لبیک کے امیدوار کے طور پر انتخابی میدان میں قسمت آزما رہے ہیں۔
ضمنی الیکشن کیلئے 56 پولنگ سٹیشن قائم کیے گئے ہیں، جن میں سے 12 حساس جبکہ 13 پولنگ سٹیشنز کو انتہائی حساس قرار دیا گیا ہے، سیکیورٹی کے سخت سخت انتظامات کیے گئے ہیں ۔
ایل اے 13 استور میں کل رجسٹرڈ ووٹرز کی تعداد 33 ہزار 378 ہے، جس میں سے 18 ہزار 231 مرد ووٹرز جبکہ خواتین ووٹرز کی تعداد 15 ہزار147 ہے۔
ضمنی الیکشن میں مسلم لیگ (ن) کے رانا فرمان، پیپلز پارٹی کے عبدالحمید اور تحریک انصاف کے خورشید احمد خان کے درمیان کانٹے کا مقابلہ متوقع ہے۔ یہ نشست سابق وزیر اعلیٰ خالد خورشید کی جعلی ڈگری کیس میں نااہلی کے بعد خالی ہوئی تھی۔
الیکشن کمیشن کاکہناہے کہ پولنگ شام 5 بجے تک جاری رہے گی۔
