اسلام آباد:ڈسٹرکٹ اینڈ سیشن کورٹ اسلام آباد نے توشہ خانہ جعل سازی کیس میں بشریٰ بی بی کی عبوری ضمانت میں توسیع کر دی۔
بشریٰ بی بی کے خلاف توشہ خانہ کیس کی سماعت ایڈیشنل سیشن جج طاہر عباس سپرا نے کی۔ بشری بی بی اپنے وکلا سلمان صفدر،انتظار پنجوتھہ اور نعیم پنجوتھہ کے ہمراہ عدالت میں پیش ہوئیں۔
تفتیشی افسر نے عدالت میں کہا کہ انہیں سابق خاتون اول بشریٰ بی بی کی گرفتاری مطلوب ہے۔ تفتیشی آفیسر نے عدالت کو آگاہ کیا کہ سابق خاتون اول کی آڈیو فرانزک کے لیے بھجوا دی گئی ہے۔
عدالت نے استفسار کیا کہ معاملہ رسیدوں کا ہے تو آڈیو کہاں سے آگئی۔
تفتیشی آفیسر نے عدالت سے استدعا کی کہ وائس میچنگ کے لیے وقت دیا جائے،عدالت نے استدعا منظور کرتے ہوئے سماعت 12 ستمبر تک ملتوی کر دی ۔
