اسلام آباد: وزیراعظم محمد شہباز شریف کی میانمار میں حالیہ تباہ کن زلزلے سے قیمتی جانی و مالی نقصان پر اظہار ہمدردی و یکجہتی کے لیے میانمار کے سفارت خانے کا دورہ کیا اور مشکل کی اس گھڑی میں ہر ممکن مدد کا یقین دلایا۔
وزیراعظم نے میانمار کے سفیر ونا ہان سے ملاقات کی اور زلزلے میں قیمتی جانی نقصان پر اظہار افسوس کیا۔ملاقات میں وفاقی وزیر اطلاعات و نشریات عطا اللہ تارڑ اور معاون خصوصی طارق فاطمی موجود تھے۔
اس موقع پر وزیراعظم نے کہا کہ ہم میانمار میں حالیہ زلزلے کے نتیجے میں زخمی ہونے والے افراد کی جلد صحتیابی اور متاثرہ خاندانوں کی بحالی کے لیے دعا گو ہیں،حکومت پاکستان خیموں، ادویات اور دیگر امدادی سامان پر مشتمل 35 ٹن کی ایک کھیپ خصوصی پرواز کے ذریعے بھجوا چکی ہے اور حسب ضرورت مزید سامان بھی بھجوایا جا رہا ہے، پاکستان میانمار کے لیے مشکل کی اس گھڑی میں ہر ممکن مدد کے لیے تیار ہے،میانمار کے سفیر نے وزیراعظم کی سفارت خانے آمد اور حکومت پاکستان کی جانب سے بھر پور تعاون پر اظہار تشکر کیا۔
میانمار کے سفیر نے کہا کہ پاکستان اور میانمار دوست ممالک ہیں اور اس مشکل گھڑی میں پاکستان کے تعاون پر میانمار کی قوم آپ کی مشکور ہے۔
