اسلام آباد : آفیشل سیکرٹ اور آرمی ترمیمی ایکٹس کیا ہیں ؟ آفیشل سیکرٹ ترمیمی بل کے مطابق اگر کوئی شخص جان بوجھ کر امن عامہ کا مسئلہ پیدا کرتا ہے ، ریاست کے خلاف کام کرتا ہے، ممنوعہ جگہ پر حملہ کرتا یا نقصان پہنچاتا ہے جس کا مقصد براہ راست یا بالواسطہ دشمن کو فائدہ پہنچانا ہے تو وہ جرم کا مرتکب ہوگا۔ آفیشل سیکرٹ ایکٹ کے تحت ملزم کا ٹرائل خصوصی عدالت میں ہوگا اور خصوصی عدالت 30 دن کے اندر سماعت مکمل کر کے فیصلہ کرے گی۔ آرمی ترمیمی بل کے مطابق کوئی بھی فوجی اہلکار ریٹائر منٹ استعفے یا برطرفی کے 2 سال بعد تک سیاسی سرگرمی میں حصہ نہیں لے گا جبکہ حساس ڈیوٹی پر تعینات فوجی اہلکار یا افسر ملازمت ختم ہونے کے 5 سال تک سیاسی سرگرمی میں حصہ نہیں لے گا۔ آرمی ترمیمی ایکٹ کے مطابق خلاف ورزی کرنے والے اہلکار کو 2 سال تک قید با مشقت کی سزا ہو گی جبکہ حاضر سروس یا ریٹائرڈ فوجی اہلکار ڈیجیٹل، الیکٹرانک یا سوشل میڈیا پر کوئی ایسی بات نہیں کرے گا جس کا مقصد فوج کو سکینڈلائنز کرنا یا اس کی تضحیک کرنا ہو۔ آرمی ایکٹ کے تحت کوئی حاضر سروس یا ریٹائر ڈ اہل کار اگرفوج کو بدنام کرے یا اس کے خلاف نفرت انگیزی پھیلائے گا اسے آرمی ایکٹ کے تحت 2 سال تک قید اور جرمانہ ہو گا۔ متن کے مطابق سرکاری حیثیت میں حاصل شدہ معلومات جو پاکستان اور افواج کی سکیورٹی اور مفاد سے متعلق ہو افشا کرنے پر 5 سال قید با مشقت تک کی سزا ہو سکے گی۔
