پاکستان اور نیوزی لینڈ آج پھر میدان میں اتریں گے

اسلام آباد : پاکستان اور نیوزی لینڈ کی کرکٹ ٹیموں کے درمیان پانچ ون ڈے میچوں کی سیریز کا چوتھا میچ آج نیشنل سٹیڈیم کراچی میں کھیلا جائے گا ۔دونوں ٹیموں کے درمیان میچ ڈے نائٹ ہو گا جو پاکستان کے معیاری وقت کے مطابق سہ پہر ساڑھے تین بجے ہو گا۔ پاکستان کو مہمان کیوی ٹیم کے خلاف پانچ میچوں کی سیریز میں کیویز کے خلاف 0-3کی فیصلہ کن برتری حاصل ہے۔ گرین شرٹس نے پہلے ایک روزہ میچ میں مہمان نیوزی لینڈ کی ٹیم کو 5 وکٹوں سے شکست دی تھی، دوسرے میچ میں 7 وکٹوں سے ہرایا تھا جبکہ تیسرے میچ میں 26 رنز سے مات دی تھی۔پاکستان کے لئے ون ڈے کرکٹ کی عالمی رینکنگ میں پہلی پوزیشن حاصل کرنے کا سنہری موقع ہے اور اس مقصد کے حصول کے گرین شرٹس دو فتوحات کی دوری پر ہے ۔ پاکستان ٹیم کو پانچ میچوں کی سیریز میں مہمان ٹیم کو کلین سویپ شکست دینا ہوگی۔اس سے قبل دونوں ٹیموں کے درمیان پانچ ٹی 20 انٹرنیشنل میچوں کی سیریز 2-2 سے برابر رہی جبکہ ایک میچ بارش کی نذر ہو گیا تھا ، ون ڈے سیریز کا چوتھا ون ڈے میچ ( کل) جمعہ کو نیشنل سٹیڈیم کراچی میں ہی کھیلا جائے گا۔ ایک روز میچوں کی سیریز میں گرین شرٹس کو مایہ ناز بیٹر بابر اعظم لیڈ کریں گے جبکہ دیگر نمایاں کھلاڑیوں میں شاداب خان ، محمد رضوان ، شاہین شاہ آفریدی ، فخر زمان اور حارث رؤف شامل ہیں ، مہمان ٹیم نیوزی لینڈ اوپنر بیٹر ٹام لیتھم کی زیر قیادت میدان میں اترے گی اور انہیں جیمز نیشم ، ایڈم ملن ، ٹام بلنڈل ، ڈیرل مچل ، مارک چیپمین جیسے بہترین کھلاڑیوں کی خدمات حاصل ہیں ۔ دونوں ٹیموں کے درمیان سیریز کا پانچواں اور آخری میچ 7 مئی کو کھیلا جائے گا، پہلے دو میچ راولپنڈی کرکٹ سٹیڈیم جبکہ آخری تین میچ نیشنل سٹیڈیم کراچی میں کھیلےجائیں گے ۔