اسلام آباد: پاکستان مسلم لیگ (ن) نے آزاد جموں و کشمیر میں پاکستان پیپلز پارٹی کی تحریکِ عدم اعتماد کی حمایت کاعلان کر دیا ۔
پیر کو ایوانِ صدر اسلام آباد میں مسلم لیگ (ن) اور پیپلز پارٹی کی قیادت کے درمیان ملاقات کے بعد میڈیا سے گفتگو کرتے ہوئے رانا ثناء اللہ نے کہا کہ ن لیگ کی پارلیمانی پارٹی نے فیصلہ کیا ہے کہ آزاد کشمیر کی موجودہ حکومت پر اعتماد نہیں کیا جا سکتا۔
انہوں نے کہا کہ پارٹی کا مؤقف واضح ہے — موجودہ حکومت کے خاتمے کے بعد آزاد کشمیر میں آزادانہ اور منصفانہ انتخابات کروائے جائیں گے۔
پیپلز پارٹی کے سینئر رہنما قمر زمان کائرہ نے اس موقع پر کہا کہ آزاد کشمیر کی موجودہ حکومت مسائل حل کرنے کے بجائے مسائل پیدا کرنے کا سبب بن چکی ہے۔
انہوں نے کہا کہ مسلم لیگ (ن) اپوزیشن میں بیٹھے گی، اور دونوں جماعتوں نے خطے میں سیاسی استحکام کے لیے مل کر کام کرنے پر اتفاق کیا ہے۔
ن لیگ کے رہنما احسن اقبال نے کہا کہ آزاد کشمیر کا موجودہ سیٹ اپ اپنی ذمہ داریاں ادا کرنے اور عوام کی توقعات پر پورا اترنے میں ناکام رہا ہے۔
انہوں نے کہا کہ مسلم لیگ (ن) اور پیپلز پارٹی کے درمیان تحریکِ عدم اعتماد پر مکمل اتفاق ہو چکا ہے۔ “ن لیگ حکومت کا حصہ نہیں بنے گی، اگر پیپلز پارٹی کو ایوان میں اکثریت حاصل ہوئی تو وہ حکومت بنائے گی۔”
ذرائع کے مطابق ملاقات سے قبل ن لیگ کا وفد — جس میں احسن اقبال، رانا ثناء اللہ، امیر مقام اور دیگر رہنما شامل تھے — صدر مملکت آصف علی زرداری سے بھی ملا۔
پیپلز پارٹی کی جانب سے بلاول بھٹو زرداری، فریال تالپور، راجہ پرویز اشرف، نیئر بخاری، قمر زمان کائرہ، چوہدری یاسین اور فیصل راٹھور ملاقات میں شریک تھے۔
