اسلام آباد: صدرِ مملکت آصف علی زرداری سے وزیرِاعظم محمد شہباز شریف نے ایوانِ صدر میں ملاقات کی اورموجودہ سیاسی و سکیورٹی صورتحال سمیت قومی اہمیت کے مختلف امور پر تبادلہ خیال کیا۔
ملاقات میں نائب وزیرِاعظم و وزیرِ خارجہ سینیٹر محمد اسحاق ڈار،وفاقی وزیر منصوبہ بندی، ترقی و خصوصی اقدامات احسن اقبال ، وزیر برائے بین الصوبائی رابطہ، سیاسی و عوامی امور رانا ثناءاللہ خان،وفاقی وزیرِ داخلہ و انسدادِ منشیات سینیٹر سید محسن نقوی، وفاقی وزیرِ قانون و انصاف و انسانی حقوق سینیٹر اعظم نذیر تارڑ، سینیٹر سلیم مانڈوی والا، سینیٹر شیری رحمٰن اور سید نیئر حسین بخاری بھی موجود تھے۔
ملاقات کے دوران صدرِ مملکت اور وزیرِاعظم نےموجودہ سیاسی و سکیورٹی صورتحال سمیت قومی اہمیت کے امور اور پاکستان کے سٹریٹجک و معاشی مفادات پر اثر انداز ہونے والی حالیہ علاقائی و بین الاقوامی پیش رفت پر تبادلہ خیال کیا۔
وزیرِاعظم نے صدرِ مملکت کو
عالمی رہنماؤں سے ملاقاتوں اور غزہ میں امن کے لیے کوششوں سمیت اپنے حالیہ دورۂ مصر اور ملائیشیا کے بارے میں آگاہ کیا۔
صدر آصف علی زرداری اور وزیرِاعظم محمد شہباز شریف نے ون آن ون ملاقات بھی کی جس میں دونوں رہنماؤں نے قومی ترجیحات اور حکومتی پالیسیوں کی مجموعی سمت پر تبادلہ خیال کیا۔
دونوں راہنماؤں نے قومی اہمیت کے معاملات پر سیاسی مشاورت جاری رکھنے پر اتفاق کیا۔
