اسلام آباد :وزیراعظم محمد شہباز شریف کی دعوت پر جمہوریہ آذربائیجان کے صدر الہام علیوف کل جمعہ سے پاکستان کا دو روزہ سرکاری دورہ کریں گے۔
ترجمان دفتر خارجہ کی جانب سے جاری بیان کے مطابق دورے کے دوران صدر الہام علیوف صدر مملکت آصف علی زرداری اور وزیر اعظم محمد شہباز شریف سے ملاقاتیں کریں گے۔
بیان میں مزید کہا گیاہے کہ فریقین دو طرفہ تعاون کو مزید مضبوط بنانے کے لیے باہمی دلچسپی کے شعبوں پر وسیع پیمانے پر بات چیت کریں گے۔ توقع ہے کہ دورے کے دوران کئی معاہدوں اور مفاہمت کی یادداشتوں پر دستخط بھی ہونگے۔
بیان کے مطابق آذربائیجان کے صدر کا دورہ دونوں ممالک کے درمیان مضبوط تعاون اور قیادت کی سطح پر بات چیت کی عکاسی کرتا ہے۔
