اسلام آباد:نائب وزیراعظم و وزیر خارجہ سینیٹر محمد اسحاق ڈار کی زیر صدارت قومی اقتصادی کونسل کی ایگزیکٹو کمیٹی (ایکنک) کا اجلاس منگل کو یہاں منعقد ہوا۔ نائب وزیراعظم کے آفس سے جاری بیان کے مطابق پاکستان ریلویز کی موجودہ مین لائن (ایم ایل ون) کی اپ گریڈیشن کو اس ہدایت کے ساتھ دوبارہ ترمیم شدہ دائرہ کار پر منظور کیا گیا کہ منصوبے کے پہلے مرحلے یعنی کراچی سے ملتان تک 929 کلومیٹر کو ترجیحی بنیادوں پر لیا جائے گا۔
ایکنک نے فلڈ ریسپانس ایمرجنسی ہاو¿سنگ پروجیکٹ (فیز-1) کے منصوبے پر غور کرکے اس کی منظوری بھی دی جسے ایشیائی ترقیاتی بینک سے قرض کے ذریعے فنڈ کیا جائے گا۔ اس منصوبے کا مقصد سندھ میں سیلاب سے متاثرہ 250000 سے زائد مکانات کی کمیونٹی کی قیادت میں تعمیر نو کے ذریعے سیلاب متاثرین کی مدد کرنا ہے۔ ایکنک نے پانی کے شعبے کے چار منصوبوں پر بھی غور کیا اور ان کی منظوری دی جس میں حکومت پنجاب کا ڈھوچہ ڈیم کی تعمیر (نظر ثانی شدہ) منصوبہ شامل ہے۔ یہ منصوبہ 35 ایم جی ڈیز پانی کی فراہمی کے ذریعے راولپنڈی میں پانی کی کمی کو پورا کرنے میں مدد دے گا۔ پانی کے شعبے کے منظور شدہ دیگر منصوبوں میں گومل زام ملٹی پرپز پروجیکٹ، منگلا ڈیم پروجیکٹ اور گولین گول ہائیڈرو پاور پروجیکٹ شامل ہیں۔ فورم نے ”انٹیگریٹڈ ٹرانزٹ ٹریڈ مینجمنٹ سسٹم کی ترقی“کی بھی منظوری دی، اس منصوبے میں طورخم، چمن اور واہگہ میں جدید ترین سرحدی کراسنگ پوائنٹس کی تعمیر اور ترقی، لینڈ پورٹ اتھارٹی کا قیام، کنٹینرائزڈ کارگو کی ڈیجیٹل اینڈ ٹو اینڈ ٹریکنگ وغیرہ شامل ہیں۔
ایکنک نے کراچی نیبر ہڈ امپروومنٹ پراجیکٹ کی منظوری دیتے ہوئے اس پر عمل درآمد کی مدت میں 31 دسمبر 2024 تک چھ ماہ کی توسیع کردی، اس منصوبے کا مقصد کراچی میں سڑکوں، گلیوں، پارکوں، کھلی جگہوں اور عوامی عمارتوں جیسے عوامی مقامات کی رسائی، استعمال اور کشش کو بڑھانا ہے۔ ایکنک نے پاکستان افغانستان بارڈر بادینی پر بارڈر ٹرمینل کی تعمیر اور ضلع سیف اللہ میں مرغہ فقیر زئی سے خان ڈگر مین بادینی روڈ تک 40 کلومیٹر طویل سڑک کی اپ گریڈیشن کی بھی منظوری دی۔
