شی-آن:وزیرِ اعظم محمد شہباز شریف اپنا پانچ روزہ تاریخی اور کامیاب دورہ چین مکمل کرکے پاکستان روانہ ہو گئے ۔
وزیرِ اعظم محمد شہباز شریف کا پانچ روزہ دورہءِ چین پاکستان اور چین کے تعلقات کی مضبوطی، دونوں ممالک کے مابین تجارتی تعلقات و اسٹریٹجک شراکت داری اور سی پیک کے دوسرے مرحلے کے آغاز کے حوالے سے اہم سنگ میل ثابت ہوا.
دورے کے اختتام پر ایک بیان میں وزیراعظم نے کہا ہے کہ حالیہ دورہ چین پاکستان اور چین کے دو طرفہ تعلقات میں ایک نئی جہت کا اضافہ ہے،چینی قیادت، شی جن پنگ اور پریمئیر لی چیانگ کا مہمان نوازی پر دل سے مشکور ہوں ،پاکستان اور چین کی دوستی لازوال اور بے مثال ہے.
وزیراعظم کا کہنا تھا کہ
سی پیک کے دوسرے مرحلے کے تحت چینی کاروباری شخصیات و سرمایہ کاروں کی پاکستانی کاروباری شخصیات اور سرمایہ کاروں سے ملاقات ہوئی،چین کی انفارمیشن ٹیکنالوجی، زراعت، معدنیات و دیگر شعبوں میں ترقی قابل تقلید ہے،چین اور پاکستان کی اقتصادی شراکت داری سے دونوں ممالک کے عوام مستفید ہونگے.
وزیرِ اعظم کا کہنا تھا کہ حالیہ دورہ چین کے دوران ہونے والی مثبت پیش رفت کے اثرات طویل مدت تک قائم رہیں گے.
پاکستان روانہ ہوتے وقت شانشی صوبے کے نائب گورنر چَھن چُھنجیانگ، اعلی چینی و پاکستانی سفارتی اہلکاروں نے وزیرِ اعظم کو الوادع کیا.
