اسلام آباد: قومی اسمبلی کا رواں اجلاس 17 مئی تک جاری رہے گا۔
سپیکر سردار ایاز صادق کی زیر صدارت قومی اسمبلی کے حالیہ اور بجٹ سیشن کے حوالے سے اجلاس منعقد ہوا۔
اجلاس میں ڈپٹی سپیکر سید غلام مصطفیٰ شاہ، ممبران قومی اسمبلی طارق فضل چوہدری، اعجاز جاکھرانی ، ملک عامر ڈوگر، سید امین الحق، نور عالم خان، گل اصغر خان، ریاض فتیانہ، خالد حسین مگسی، بلال کیانی اور دیگر پارلیمانی لیڈرز نے شرکت کی۔
اجلاس میں قومی اسمبلی کے آج سے شروع ہونے والے اجلاس کے حوالے سے ایجنڈے اور دنوں کے تعین کے متعلق تبادلہ خیال کیا گیا اورقومی اسمبلی کا موجودہ اجلاس 17 مئی تک جاری رکھنے پر اتفاق کیا گیا۔
اجلاس میں صدر کے خطاب پر پیش کردہ شکریے کی تحریک کے حوالے سے تقاریر کے وقت کا بھی تعین کیا گیااور سٹینڈنگ کمیٹیوں اور اسمبلی کی فنانس کمیٹی کی تشکیل کے حوالے سے بھی بات چیت کی گئی۔
اجلاس میں مالی سال 2024-25 کا بجٹ اجلاس 6 جون 2024 سے شروع کرنے کی تجویز پیش کی گئی ۔
