اسلام آباد :نائب وزیر اعظم اور وزیر خارجہ اسحاق ڈار 4 اور 5 مئی کو(بانجل) گیمبیا میں 15ویں او آئی سی سربراہ اجلاس میں پاکستانی وفد کی قیادت کریں گے۔
دفتر خارجہ کی جانب سے جاری بیان کے مطابق نائب وزیراعظم اور وزیر خارجہ اسحاق ڈار 2 اور 3 مئی کو او آئی سی کونسل آف فارن منسٹرز اجلاس میں بھی شرکت کریں گے اوراس اجلاس میں سربراہ اجلاس کے ایجنڈے کو حتمی شکل دی جائے گی۔دفتر خارجہ کے مطابق یہ اجلاس ایک ایسے مشکل وقت میں ہورہا ہے جب مسلم امہ غزہ کے عوام مسلسل حالت جنگ میں ہیں۔
یہ اسلامی ممالک کے سربراہان کے لئے ایک اہم موقع ہوگا جہاں وہ غزہ کی صورتحال پر غور کریں اور ایک مضبوط،اجتماعی اور متفقہ موقف اپنائیں۔سربراہ اجلاس کے موقع پر نائب وزیر اعظم اسحاق ڈار غزہ میں حالیہ نسل کشی،بھارت کے غیر قانونی زیر قبضہ جموں وکشمیر میں بنیادی حق خودارادیت ،مسلم امہ کے اتحاد اور یکجہتی،اسلامو فوبیا میں اضافے،دہشتگردی اور عالمی چیلنجوں پر پاکستان کا موقف پیش کریں گے۔اجلاس کے موقع پر نائب وزیر اعظم اور وزیر خارجہ اجلاس میں شریک سربراہان اور وزراء خارجہ سے ملاقاتیں بھی کریں گے۔
