اسلام آباد:وفاقی وزیر تجارت جام کمال خان نے کہا ہے کہ پاکستان اور ترکمانستان کےدرمیان ٹرانزٹ ٹریڈ ایگریمنٹ کامعاہدہ تکمیل کےآخری مرحلے میں ہے، دونوں ممالک کو اس تجارتی معاہدے سے بہت زیادہ فوائد حاصل ہونگے۔
وزارت تجارت کے اعلامیہ کے مطابق وزیر تجارت نے ان خیالات کا اظہار بدھ کو اپنے دفتر میں پاکستان میں تعینات ترکمانستان کے سفیر اتاجان مولاموف سے ملاقات میں کیا۔پاکستان میں ترکمانستان کے سفیر اتاجان مولاموف نے وفاقی وزیر تجارت جام کمال خان کو ان کی حالیہ تقرری پر مبارکباد پیش کی۔ ملاقات میں دونوں ممالک کے درمیان تجارتی تعلقات کو فروغ دینے کے حوالے سے تبادلہ خیال کیا گیا۔ وزیر تجارت جام کمال نے کہا کہ ترکمانستان کے ساتھ دوطرفہ تجارتی تعلقات کو مزید مضبوط بنایا جائے گااور تجارتی حجم میں بھی اضافہ کیا جائے گا۔ ملاقات میں تجارت کے لئے نئے راستوں کی تلاش اور ٹرانزٹ ٹریڈ معاہدوں کے ذریعے تجارتی حجم کو بڑھانے کے حوالے سے موثر حکمت عملی اپنانے پر تبادلہ خیال کیا گیا۔ ترکمانستان کے سفیر نے پاکستان میں مقامی پیداوار کے مقابلے سستی بجلی دینے کی پیشکش بھی کی اس کے علاوہ ایل پی جی اور بجلی جیسے توانائی کے شعبوں میں تعاون بڑھانے پر بھی بات چیت کی گئی.
