اسلام آباد : مسلم لیگ ن کے صدر شہباز شریف ملک کے 24 ویں وزیراعظم منتخب ہو گئے۔
سپیکر قومی اسمبلی سردار ایاز صادق نے وزیراعظم کے انتخاب کے نتائج کا اعلان کیا۔
شہباز شریف کو 201 ووٹ ملے جبکہ ان کے مد مقابل امیدوار عمر ایوب خان نے 92 ووٹ حاصل کیے۔
قبل ازیں قومی اسمبلی کا اجلاس شروع ہوتے ہی سنی اتحاد کونسل کے اراکین نے اسپیکر کی ڈائس کے سامنے احتجاج شروع کر دیا۔
نئے قائد ایوان کے انتخاب کے عمل سے قبل5 منٹ تک گھنٹیاں بجائی گئیں، گھنٹیاں بجائے جانے کے بعد ایوان کے دروازے بند کر دیے گئے اور اسپیکر کی جانب سے اعلان کیا گیا کہ شہباز شریف کے حق میں جو اراکین ہیں لابی اے کی طرف چلے جائیں جبکہ عمر ایوب کے حق میں اراکین لابی بی میں چلے جائیں۔
جے یو آئی ف کے اراکین وزیراعظم کے انتخاب کی کارروائی کا حصہ نہ بنے اور قومی اسمبلی ہال سے باہر چلے گئے جبکہ بی این پی مینگل کے سربراہ سردار اختر مینگل ایوان میں بیٹھے رہے اور انہوں نے کسی کو بھی ووٹ نہیں ڈالا۔
وزیراعظم منتخب ہونے کے بعد شہباز شریف نے ایوان سے خطاب کیا لیکن ان کے خطاب کے دوران بھی سنی اتحاد کونسل کے ارکان احتجاج کرتے رہے اور انہوں نے ایوان میں شور شرابہ کیا اور مسلسل نعرے بازی جاری رہی اس دوران مسلم لیگ ن کے ارکان بھی وزیراعظم کے گرد جمع ہو گئے اور انہوں نے سنی اتحاد کونسل کے ارکان کے نعروں کا بھرپور جواب دیا۔
