اسلام آباد : ماچھیکے۔ٹھلیاں۔تاروجبہ وائٹ آئل پائپ لائن منصوبہ کیلئے کنسورشیم کی تشکیل سے متعلق فریقین کے درمیان مفاہمت کی یادداشت پر دستخط کر دیئے گئے۔
دستخطوں کی تقریب خصوصی سرمایہ کاری سہولت کونسل میں منعقد ہوئی۔
تقریب میں وفاقی وزیر توانائی محمد علی، سیکرٹری پٹرولیم ڈویژن مومن آغا اور سیکرٹری ایس آئی ایف سی جمیل قریشی بھی موجود تھے۔ ایم ڈی پاکستان سٹیٹ آئل (پی ایس او) سید محمد طحہٰ، ڈائریکٹر جنرل فرنٹیئر ورکس آرگنائزیشن (ایف ڈبلیو او) میجر جنرل عبدالسمیع اور منیجنگ ڈائریکٹر انٹر سٹیٹ گیس سسٹمز پرائیویٹ لمیٹڈ ندیم باجوہ نے مفاہمت کی یادداشت پر دستخط کئے۔
پائپ لائن منصوبہ پٹرولیم ڈویژن اور خصوصی سرمایہ کاری سہولت کونسل (ایس آئی ایف سی ) کے عزم کا عکاس ہے۔ ماچھیکے۔ٹھلیاں۔تاروجبہ وائٹ آئل پائپ لائن منصوبے کا مقصد کراچی سے پشاور تک تیل کی پائپ لائن کی تکمیل کے علاوہ پٹرولیم مصنوعات کی موثر نقل و حمل اور ملاوٹ کی روک تھام کے ساتھ ساتھ حفاظتی اقدامات کو یقینی بنانا ہے۔
یہ پائپ لائن لاہور کے قریب ماچھیکے سے پشاور کے قریب تارو جبہ تک مکمل کی جائے گی۔ پائپ لائن تین حصوں پر مشتمل ہے جن میں ماچھیکے۔چک پیرانہ، چک پیرانہ سے روات اور روات سے تاروجبہ شام ہیں۔ یہ فلیگ شپ منصوبہ ایف ڈبلیو او کی زیر پرستی پی ایس او اور آئی ایس جی ایس مشترکہ تعاون سےمکمل کیا جائے گا۔
427 کلومیٹر طویل پائپ لائن کا مقصد ابتدائی طور پر 6 ایم ٹی پی اے گنجائش کے ساتھ کراچی سے پشاور تک پٹرولیم مصنوعات کی موثر سپلائی چین کو یقینی بنانا ہے۔ اس پائپ لائن سے ٹریفک کے دبائو ، ماحولیاتی آلودگی اور نقل و حمل کے اخراجات میں نمایاں کمی لانے میں مدد ملے گی۔
